அடுத்த மாதம் நாடு முழுமையாகத் திறக்கப்படும்

சுற்றுலா துறையை மேம்படுத்தும் நோக்கில் அடுத்தமாதம் நடுப்பகுதியில் நாடு முழுமையாக திறக்கப்படும் என்று பஸில் ராஜபக்ஸ தெரிவித்துள்ளார். பொருளாதார வீழ்ச்சியில் இருந்து நாட்டை காப்பாற்றும் நோக்கில் சுகாதார வழிமுறைகளுக்கு அமைவாக வெளிநாட்டு சுற்றுலா பயணிகளுக்காக நாடு முழுமையாகத் திறக்கப்படும் என்று அவர் மேலும் கூறினார். எதிர்வரும் 26 ஆம் திகதி 38 விமானங்களில் 9600 சுற்றுலா பயணிகளை நாட்டுக்கு அழைத்து வருவதற்கு ஏற்பாடு  செய்யப்பட்டுள்ளது என்றும் பஸில் தெரிவித்தார்.

தனிமைப்படுத்தப்பட்ட பகுதிகளின் ஊடாகச் செல்லும் பெண்களின் கவனத்துக்கு!

கொரோனா தொற்று காரணமாக தனிமைப்படுத்தப்பட்டுள்ள பகுதிகளின் ஊடாக பயணம் செய்யும் பெண்கள் அவதானமாகப் பயணிக்குமாறு பொலிஸ் ஊடகப் பேச்சாளர் அஜித் ரோஹன கோரிக்கை விடுத்துள்ளார். அவ்வாறான பல பகுதிகளின் ஊடாக பயணம் செய்யும் பெண்களின் தங்கச் சங்கிலிகள் சிலரால் கொள்ளையிடப்பட்டுள்ள சம்பவங்கள் பதிவாகியுள்ளன என்றும் இது தொடர்பில் அவதானமாக பயணிக்குமாறும் அவர் கூறியுள்ளார். குறிப்பாக,வேலைக்குச் செல்லும் பெண்கள் அவ்வாறு வேலைக்குச் செல்லும்போதும் வீட்டுக்குத் திரும்பி வரும்போதும் அவதானமாக இருக்க வேண்டும் என்றும் அவர் கூறினார். திருடர்கள் மோட்டார் சைக்களில் வந்து பெண்களிடம் முகவரி கேட்பதுபோல் நெருங்கி மாலையை கொள்ளையடித்துச் செல்ல முடியும். அவ்வாறு வருபவர்கள் தொடர்பில் அவதானமாக இருக்க வேண்டும் என்று அஜித் ரோஹன மேலும் தெரிவித்துள்ளார். 

அதுலுகமவில் விஸ்வரூபம் எடுக்கும் கொரோனா:மூன்றில் ஒரு பகுதியினருக்கு தொற்று

பண்டாரகம அதுலுகமவில் வசிக்கும் 20 ஆயிரம் மக்களுள் மூன்றில் ஒரு பகுதியினருக்கு கொரோனா தொற்று ஏற்பட்டுள்ளது என்று பண்டாரகம,மெதகம பொது சுகாதார வைத்திய அதிகாரி  எஸ்.யு.மதுஷான் தெரிவித்தார். அங்கு அண்மையில் 1541 பேருக்கு மேற்கொள்ளப்பட்ட பிசிஆர் பரிசோதனையின்போது 547 பேருக்கு கொரோனா தொற்று ஏற்பட்டிருப்பது தெரிய வந்தது. இதன்மூலம் அந்த மக்களில் மூன்றில் ஒரு பகுதியினருக்கு கொரோனா தொற்று ஏற்பட்டிருக்கின்றமை உறுதி செய்யப்பட்டுள்ளது. இதனைத் தொடர்ந்து அங்கு மேலும் 18,459 பேருக்கு பிசிஆர் பரிசோதனை மேற்கொள்ளப்படவுள்ளது.

481 இலங்கையர்கள் நாடு திரும்பினர்

வெளிநாடுகளில் இருந்து இருந்து 481 இலங்கையர்கள் நாடு திரும்பினர்.சற்று நேரத்திற்க்கு முன் அவர்கள் கட்டுநாயக்க விமான நிலையத்தை வந்தடைந்தனர். அதன்படி,அபுதாபியில் இருந்து 44 பேரும் கட்டாரில் இருந்து 147 பேரும் ஏனைய மத்திய கிழக்கு நாடுகளில் தொழிலுக்கு சென்று நிற்கதியாகிய 290 பேரும் நாட்டை வந்தடைந்தனர். அவர்கள் அனைவரும் pcr சோதனைக்கு உட்படுத்தப்பட்ட பின்னர்  தனிமைப்படுத்தல் நிலையங்களுக்கு அனுப்பி வைக்கப்படுவர்.

கொரோனாவை விசாரிக்க சென்ற 20 சிஐடிக்கு கொரோனா 

பிரான்டிக்ஸ் ஆடை தொழில்சாலையில் கொரோனா தொற்று ஏற்பட்டிருப்பது எப்படி என்று விசாரிக்க சென்ற சிஐடியினர் 20 பேருக்கு கொரோனா தொற்று ஏற்பட்டுள்ளது என்று பொலிஸ் ஊடக பேச்சாளர் அஜித் ரோகண தெரிவித்துள்ளார். இது தொடர்பாக நவம்பர் 5 முதல் பொலிஸார் விசாரித்து வருகின்றனர்.அவர்கள் பிரான்டிக்ஸ் ஊழியர்களையும் விசாரித்து வருகின்றனர். சட்டமா அதிபரின் அறிவுறுத்தலுக்கு அமைய பொலிஸ்மா அதிபர் கொழும்பு குற்ற பிரிவை சேர்ந்த பொலிஸாரை விசாரணைக்கு அமர்த்தினார்.அவர்களுள் 70 பேருக்கு கொரோனா தொற்று ஏற்பட்டதால் சிஐடியினரை அந்த பணிக்கு நியமித்தார். அவ்வாறு நியமிக்கபட்ட 20 பேருக்கே இப்போது கொரோனா தொற்று ஏற்பட்டுள்ளது.

அமைச்சருக்கு 2.5 கோடி ரூபா லஞ்சம்: எதற்கு தெரியுமா?

ஷாம்பூ ,ஜெல் அடங்கிய ஸசே பக்கட்களின் தடையை 6 மாதங்களுக்கு ஒத்திப் போடுவதற்காக சுற்றால் அமைச்சர் மஹிந்த அமரவீரவுக்கு 2.5 கோடி ரூபாவை லஞ்சமாக வழங்குவதற்கு தனியார் நிறுவனம் ஒன்று திட்டமிட்டுள்ளது என்று தகவல்கள் வெளியாகியுள்ளன. எதிர்வரும் ஜனவரி முதல் ஷாம்பூ ,ஜெல்,பால்,உணவு பொருட்கள்  அடங்கிய ஸசே பக்கட்களை தடை செய்வதற்கு சுற்றாடல் அமைச்சு தீர்மானித்துள்ளது. அந்தத் தடையை ஒத்திப் போடுவதற்காக அந்த சுற்றால் அமைச்சருக்கு 2.5 கோடி ரூபாவை லஞ்சமாக வழங்குவதற்கு தனியார் நிறுவனம் ஒன்று திட்டமிட்டுள்ளது. அந்த பணத்தை அமைச்சரின் தேவைக்காகவோ அல்லது அமைச்சின்  தேவைக்காகவோ பயன்படுத்த முடியும் என்று அந்த நிறுவனத்தின் பிரதிநிதிகள் அமைச்சரிடம் தெரிவித்துள்ளனர். அமைச்சரோ அதை மறுத்துள்ளார்.2500 கோடி ரூபா தந்தாலும் அரசின் இந்த முடிவில் மாற்றமில்லை என்று அவர்களிடம் கூறியுள்ளார். ஸசே பக்கட்கள் சூழலுக்கு அதிக பாதிப்புகளை உண்டு பண்ணுவதாலேயே அவற்றை தடை செய்வதற்க்கு நடவடிக்கை எடுக்க பட்டுள்ளது என்று அமைச்சர் கூறியுள்ளார்.

றிஸாத்தின் சகோதரியின் வீட்டை பயன்படுத்திய சஹ்ரானின் ஆட்கள் 

வத்தளையில் உள்ள தனது சகோதரியின் இல்லம் உயிர்த்த ஞாயிறு தாக்குதல் நடத்திய தற்கொலைதாரிகளால் பாதுகாப்பு இடமாகப் பயன்படுத்தப்பட்டது என்று றிசாத் பதியுதீன் நேற்று உயிர்த்த ஞாயிறு தாக்குதல் தொடர்பாக விசாரணை செய்யும் ஆணைக்குழு முன் கூறினார். கனடாவில் வசிக்கும் றிஸாத்தின் சகோதரியின் வத்தலை வீட்டை தற்கொலைதாரிகள் பயன்படுத்தியமை உங்களுக்குத் தெரியுமா என்று ஆணைக்குழு ரிசாதிதான் கேள்வி எழுப்பியது. இந்தத் தாக்குதல் இடம்பெற்று முடிந்த பின்னர் இது தனக்குத் தெரிய வந்தது என்று அவர் கூறினார்.அது வாடகைக்குக் கொடுக்கப்பட்டது என்றும் எந்த நோக்கத்துக்காக அந்த வீடு வழங்கப்பட்டது என்று தனக்குத் தெரியாது என்றும் அவர் கூறினார். தற்கொலைதாரிகள் அங்கு தங்கி இருந்தபோது நீங்கள் அந்த வீட்டுக்கு போயிருக்கிறீர்களா என்று ரிசாத்திடம் ஆணைக்குழு கேட்ட கேள்விக்கு அவர் இல்லை என்று கூறினார். றிஸாத்தின் சகோதரர்களான றிப்கான் மற்றும் ரியாஜ் ஆகியோர் சஹ்ரானுடனும் ஏனைய தற்கொலைதாரிகளுடனும் வைத்திருந்த உறவுபற்றி ஆணைக்குழு ரிசாத்திடம் கேள்வி எழுப்பியது.ரியாஜ் கைது செய்யப்பட்டமைக்கான காரணம் பற்றியும் ஆணைக்குழு வினவியது. தற்கொலைதாரி இன்ஸாப் அஹமட் உடன் 7 தொலைபேசி உரையாடல்கள் நடத்திய குற்றச்சாட்டின் அடிப்படையிலேயே ரியாஜ் கைது செய்யப்பட்டார். இன்ஸாபின் பித்தளை ஏற்றுமதி இடைநிறுத்தப்பட்டபோது அதற்கான காரணத்தை என்னிடம் வினவினார் ரியாஜ்.நான் இது தொடர்பில் தேடிப்பார்த்தேன். அது ஜனாதிபதி செயலகத்தால் இடைநிறுத்தப்பட்டுள்ளது.என்னால் எதுவும் செய்ய முடியாது என்று ரியாஜிடம் கூறினேன். இந்தத் தகவலை ரியாஜ் இன்ஸாபிடம் கூறுவதற்காக அந்தத் தொலைபேசி உரையாடலை நிகழ்த்தி இருக்கலாம்.மேலும்,இன்ஸாப்தான் அந்த 7 தடவைகளும் ரியாஜுக்கு அழைப்பு எடுத்துள்ளார் என்று பதிலளித்தார். இன்ஸாபின் தொழில்சாலைக்கு 25 ஆயிரம் கிலோ பித்தளை வழங்கியமை தொடர்பிலும் அதை வழங்குவதற்கு றிசாத் மறைமுகமாக ஆதரவு வழங்கியதாக கூறப்படுகின்றமை தொடர்பிலும் ஆணைக்குழு கேள்வி எழுப்பியது. இதில் தான் தொடர்புபடவில்லை என்று கூறினார்.

வில்பத்து தீர்ப்புக்கு எதிராக  றிசாத் பதியுதீன் உயர் நீதிமன்றில் வழக்கு

வில்பத்து காடழிப்பு தொடர்பான நீதிமன்ற தீர்ப்புக்கு எதிராக உயர் நீதிமன்றில் மனுத்தாக்கல் செய்யவுள்ளதாக முன்னாள் அமைச்சர் றிசாத் பதியுதீன் தெரிவித்துள்ளார். உயிர்த்த ஞாயிறு தாக்குதல் தொடர்பாக விசாரணை செய்யும் ஜனாதிபதி ஆணைக்குழு முன் சாட்சியம் வழங்கும்போதே இவ்வாறு கூறினார். மகசின் சிறைச்சாலையில் இருக்கும் அவர் அங்கிருந்தவாறே skype ஊடாக சாட்சியம் வழங்கினார். றிசாத் பதியுதீன் மீள்குடியேற்ற அமைச்சராக இருந்தபோது எத்தனை சிங்களவர்களை வடக்கில் மீள்குடியேற்றினீர்கள் என்று அவரிடம் ஆணைக்குழு கேள்வி எழுப்பியது. கிழக்கில் 2 லட்சம் தமிழர்கள் மீள்குடியமர்த்தப்பட்டார்கள்.சிங்கள வர்த்தக சமூகத்தை மீள் குடியமர்த்த நடவடிக்கை எடுக்கப்பட்டிருந்தது. வடக்கில் 2 வீத சிங்களவர்களும் 5 வீத முஸ்லிம்களும் இருந்தனர்.அவர்கள் போர்க்காலத்தில் வெளியேற்றப்பட்டனர்.இருந்தும்,2009 இற்கு பின் அப்போதைய அமைச்சர் பசில் ராஜபக்ஸவின் மேற்பார்வையின்கீழ் மீள்குடியேற்றம் இடம்பெற்றது. வன்னி மாவட்ட அபிவிருத்தி குழுத் தலைவர் என்ற அடிப்படையில் இதற்கு நான் பூரண ஒத்துழைப்பு வழங்கினேன். 75 முதல் 100 வ்ருடங்கள் பழமையான மரங்கள் வெட்டி வீழ்த்தப்பட்டு மொனராகலை மற்றும் ஹம்பாந்தோட்டை ஆகிய இடங்களை சேர்ந்த 5000 சிங்களவர்கள் கலபோகஸ்வெவ மற்றும் நாமல் கம ஆகிய கிராமங்களில் குடியேற்றப்பட்டனர்.இதற்கு எதிராக யாரும் முறைப்பாடு செய்யவில்லை. கல்லாறு பகுதியில் விஜய கம்மானய என்ற சிங்கள கிராமத்தில் சிங்கள மக்களுக்கும் வீடுகள் அமைக்கப்பட்டன.கல்லாறு பகுதியில் அமைச்சர் டக்ளஸ் தேவானந்தவின் ஆதரவாளர்களான தமிழர்களும் குடியேற்றப்பட்டனர். அங்கு மரங்கள் எவையும் வெட்டப்பட்டவில்லை.இது தொடர்பான நீதிமன்றத் தீர்ப்புக்கு எதிராக நான் உயர் நீதிமன்றில் மனுத் தாக்கல் செய்யவுள்ளேன்.என்றார். இந்த ஆணைக்குழுவில் வில்பத்து காடு தொடர்பாக தீர்ப்பு வழங்கிய 2 நீதிபதிகளும் உறுப்பினர்களாக இருக்கின்றமை குறிப்பிடத்தக்கது.

பாம்பு தீண்டியது சிவாஜிலிங்கத்தை:வைத்தியசாலையில் சேர்க்கப்பட்டார்

முன்னாள் மாகாண சபை உறுப்பினர் எம்.கே.சிவாஜிலிங்கம் பாம்பு தீண்டிய நிலையில் பருத்தித்துறை – மந்திகை ஆதார வைத்தியசாலையில் சிகிச்சைக்காக சேர்க்கப்பட்டுள்ளார். நேற்று வெள்ளிக்கிழமை இரவு 9.30 மணியளவில் வல்வெட் டித்துறை நகர சபைக்கு அருகாமையில் உள்ள அவரது அலுவலகத்திலிருந்து வீடு செல்வதற்காக அலுவலகத்தின் கதவை மூடியபோது அதிலிருந்த பாம்பு ஒன்று கையில் தீண்டியதாகத் தெரிவிக்கப்பட்டது. மந்திகை ஆதார வைத்தியசாலையில் உடனடியாக அவர் சேர்க்கப்பட்டார். அங்கு மருத்துவ பரிசோதனையின் பின்னர் அவருக்கு சிகிச்சையளிக்கப்பட்டது. தற்போது மருத்துமனை அதிதீவிர சிகிச்சைப் பிரிவில் உள்ள சிவாஜிலிங்கம் நாளை காலைதான் வீடு செல்ல அனுமதிக்கப்படுவார் எனத் தெரிகின்றது. 24 மணி நேரத்துக்கு மருத்துவக் கண்காணிப்பில் அவர் வைக்கப்பட்டிருப்பதாகத் தெரிவிக்கப்படுகின்றது.

கொரோனாபற்றி போலி செய்தி பரப்புபவர்களை பிடிக்க இன்டெர்போலின் உதவி

வெளிநாடுகளில் இருந்துகொண்டு கொரோனாபற்றி போலியான செய்திகளை பரப்பிவரும் இலங்கையர்களை கைது செய்துவதற்கு பொலிஸ் தலைமையகம் நடவடிக்கை எடுத்துள்ளது. இதற்காக சர்வதேச பொலிஸான இன்டெர்போலின் உதவியைக் கோருவதற்கு நடவடிக்கை எடுக்கப்பட்டுள்ளது. கொரோனா காரணமாக வீதிகளில் விழுந்து மக்கள் உயிரிழக்கிறார்கள் என்றும் அதனால் நாடு முழுவதையும் முடக்க வேண்டிய கட்டாயம் ஏற்பட்டுள்ளது என்றும் போலிச் செய்திகளை தயாரித்து சமூக ஊடகங்களில்  பரப்பிய 30 பேர் கைது செய்யப்பட்டுள்ளனர். அதேபோல்,இந்தச் செய்திபற்றி ஆராய்ந்து பார்க்காமல் கண்ணைமூடிக்கொண்டு சமூக ஊடகங்களில் பரப்பிய மேலும் 30 பேரும் கைது செய்யப்பட்டுள்ளனர். இதுபோன்ற செய்திகளை வெளிநாடுகளில் இருந்துகொண்டு பரப்பிவரும் இலங்கையர்களை கைது செய்வதற்கும் இலங்கை பொலிஸார் சர்வதேச பொலிஸாரின் ஊடாக நடவடிக்கை எடுத்துள்ளனர்.

உயிர்த்த ஞாயிறு தாக்குதல் சந்தேகநபரின்  வீட்டுக்கு பல தடவைகள் சென்ற ஹலீம்-றிசாத்

உயிர்த்த ஞாயிறு தாக்குதல் சந்தேகநபரான முஹினுதீன் இஹ்ஸான் அஹமடின் வீட்டுக்கு முன்னாள் அமைச்சர்கள் முஹம்மட் ஹலீம் மற்றும் றிசாத் பதியுதீன் ஆகியோர் பல தடவைகள் சென்று வந்துள்ளனர் என்று தெரிவிக்கப்படுகிறது. இஹ்ஸானின் வீடு அமைந்துள்ள கள்வள வீதி,தெஹிவல பகுதிக்கு பொறுப்பான கிராம சேவகர் நிலந்த சஞ்சீவ பொன்சேகா நேற்று உயிர்த்த ஞாயிறு தாக்குதல் தொடர்பாக விசாரணை செய்யும் ஜனாதிபதி ஆணைக்குழு முன் சாட்சியம் வழங்கும்போதே இவ்வாறு கூறினார். இஹ்ஸானின் சொந்த வீடு அப்போது திருத்தப்பட்டுக்கொண்டு இருந்ததால் அவர் மனைவி பிள்ளைகளோடு வாடகை வீட்டில்தான் இருந்தார். அந்த வீட்டில் அவர் பல இளைஞர்களோடு கலந்துரையாடல்களில் ஈடுபடுகிறார் என்று அறிந்தேன்.அதேபோல்,முன்னாள் அமைச்சர்கள் ஹலீம் மற்றும் றிசாத் ஆகியோர் பல தடவைகள் அங்கு வந்து சென்றுள்ளனர் என்றும் அறிந்தேன். குண்டு வெடிப்பு தினத்தன்று இஹ்ஸான் வீட்டில்தான் இருந்தார் என்று அவர் அங்கு மேலும் கூறினார். பதியுதீன் அங்கு வந்ததை கண்டீர்களா என்று ஆணைக்குழு வீட்டின் உரிமையாளரான தம்மிக்க பிரியந்த சமரசிங்கவிடம் கேட்டது. இஹ்ஸான் கைது செய்யப்பட்டு இரண்டு நாட்கள் கழித்து 26 ஆம் திகதி ஏப்ரல் றிசாத் வந்திருந்தார்.30 நிமிடங்கள்வரை அங்கு இருந்துவிட்டு வெளியேறினார். அப்போது அங்கு ஆஜராகி இருந்த றிசாத் பதியுதீனின் சட்டத்தரணி இது தொடர்பில் ரிசாத்திடம் அறிவுறுத்தல்களை பெறுவதற்கு தனக்கு வாய்ப்பளிக்குமாறு ஆணைக்குழுவிடம் கோரினார். இந்தக் கோரிக்கை தொடர்பில் உரிய நடவடிக்கைகளை எடுக்குமாறு ஆணைக்குழுவின் தலைவர் ஆணைக்குழுவின் செயலாளரிடம் உத்தரவிட்டார்.     

வில்பத்து காடழிப்பு சட்டவிரோதம்:சொந்தச் செலவில் றிசாத் மரங்களை நடவேண்டும்: நீதிமன்றம் இன்று தீர்ப்பு

முஸ்லிம்களின் மீள்குடியேற்றத்துக்காக வில்பத்து கல்லாறு காடுகள் அழிக்கப்பட்டமை சட்டவிரோதமானது என்று இன்று கொழும்பு மேன்முறையீட்டு நீதிமன்றம் தீர்ப்பளித்தது.  காட்டை அழித்த முன்னாள் அமைச்சர் றிசாத் பதியுதீன் அவரது சொந்த செலவில் அந்த இடத்தில் மரங்களை நடவேண்டும் என்று அந்தத் தீர்ப்பில் குறிப்பிடப்பட்டுள்ளது. சூழலியல் அமைப்பு ஒன்று 2015 இல் இந்த வழக்கை தாக்கல் செய்திருந்தது.நீண்ட விசாரணைக்குப் பின் கடந்த வருடம் ஓகஸ்ட் 6 ஆம் திகதி இதற்கான தீர்ப்பு வழங்கப்படவிருந்தது.அப்போது இந்த வழக்கை விசாரித்து வந்த நீதிபதி மஹிந்த சமயவர்தன அதில் இருந்து விலகினார்.  இதனால் ஜனந்த சில்வா மற்றும் நிசங்க பந்துல கருணாரத்ன ஆகிய மேல்முறையீட்டு நீதிபதிகள் இந்த வழக்கை பொறுப்பேற்று அதை மீண்டும் ஆரம்பத்தில் இருந்து விசாரித்து வந்தனர்.அதன் அடிப்படையில் அது மீதான தீர்ப்பு இன்று வழங்கப்பட்டது. மீள்குடியேற்றத்துக்காக அங்கு காடுகள் அழிக்கப்பட்டமை சட்டவிரோதமானது என்றும் அதை மேற்கொண்ட றிசாத் பதியுதீன் சொந்த நிதியில் அங்கு மரங்களை மீள நடவேண்டும் என்றும் தீர்ப்பு வழங்கப்பட்டது. வழக்குத் தாக்கல் செய்தவர்களின்  வழக்குச் செலவையும் மீளச் செலுத்த வேண்டும் என்றும் தீர்ப்பு வழங்கப்பட்டுள்ளது.  

9 பொலிஸாருக்கு கொலை மிரட்டல்:அதற்காக பொலிஸ் அதிகாரி துப்பாக்கியுடன் தலைமறைவு

குருவிட்ட பொலிஸ் நிலையத்தில் கடமையாற்றி வந்த பொலிஸ் அதிகாரி ஒருவர் 15 நாட்களாக துப்பாக்கியுடன் தலைமறைவாகியுள்ளார். அந்த பொலிஸ் நிலையத்தின் பொறுப்பதிகாரி உள்ளிட்ட 9 பொலிஸாரை சுட்டுக்கொல்லப்போவதாக அவர் தெரிவித்துள்ளார். இதனால் இவரைக் கைது செய்வதற்கு 10 பொலிஸ் குழுக்கள் களத்தில் இறக்கப்பட்டுள்ளன.துப்பாக்கியுடன் தலைமறைவாகியுள்ள அவர் குருநாகலில் உள்ள அவரது உறவினரின் வீட்டுக்குச் சென்று தான் 9 பொலிஸாரை கொலை செய்வதற்காக துப்பாக்கியுடன் வெளியேறியுள்ளதாகத் தெரிவித்துள்ளார். அதில் முதலிடத்தில் இருப்பது குருவிட்ட பொலிஸ் நிலைய பொறுப்பதிகாரி என்றும் கூறியுள்ளார். அதன் பின் அவர் அங்கிருந்து சென்றுள்ளார். குருநாகலைச் சேர்ந்த கே.சுமித் எனும் 40 வயதுமிக்க இந்த பொலிஸ் கான்ஸ்டபிள் இரத்தினபுரி,அயகம பகுதியில் திருமணம் முடித்துள்ளார். அப்பகுதியில் உள்ள போதைப்பொருள் வர்த்தகர்கள் மற்றும் குற்றவாளிகளுடன் தொடர்பு வைத்துள்ளமையும் தெரியவந்துள்ளது.

பிச்சைக்காரர்கள் இன்று முதல் கைது !

கொழும்பு மற்றும் அதனை அண்டிய பகுதிகளில் செயற்படும் 'சிக்னல் லைட்' பிச்சைக்காரர்கள் இன்று முதல் கைது செய்யப்படவுள்ளனர். அவர்களால் கோரோனோ வைரஸ் பரவுவதற்கான சாத்தியம் அதிகம் காணப்படுவதாலேயே இந்த நடவடிக்கை எடுக்கப்பட்டுள்ளது என்று பிரதி பொலிஸ்மா அதிபர் அஜித் ரோஹன தெரிவித்தார். கைது செய்யப்படுபவர்கள் நீதிமன்றில் ஆஜர்படுத்தப்படுவர் என்றும் சம்பந்தப்பட்ட பொலிஸ் நிலையங்களுக்கு இதுபற்றி அறிவுறுத்தப்பட்டுள்ளது என்றும் அவர் மேலும் கூறினார்.

கொரோனாபற்றி போலிச் செய்தி:25 பேர் கைது

கொரோனாபற்றி போலியான செய்திகளை பரப்பி வந்த 25 பேர் இதுவரை கைது செய்யப்பட்டுள்ளனர் என்று பிரதி பொலிஸ்மா அதிபர் அஜித் ரோஹன தெரிவித்தார். இந்த வருடம் மார்ச் முதல் இப்போதுவரை இந்தக் கைது இடம்பெற்றிருப்பதாக அவர் மேலும் தெரிவித்தார். ஆகவே,இந்த விடயத்தில் மிகவும் கனமாகவும் பொறுப்பாகவும் செயற்படுமாறு அவர் மக்களிடம் கோரிக்கைவிடுத்துள்ளார். 

ஜனாஸாக்கள் எரிக்கப்படுவதை தடுப்பதற்காக 20 இற்கு வாக்களித்திருக்கலாமே?

கொரோனாவால் உயிரிழக்கும் ஜனாஸாக்கள் எரிக்கப்படாது என்று ஜனாதிபதியிடம் உறுதிமொழி  வாங்கிவிட்டு முஸ்லிம் எம்பிக்கள் 20 இற்கு ஆதரவாக வாக்களித்திருந்தால் பரவாயில்லை.அப்படி எதுவும் இல்லாமல் சஜித் பிரேமதாசாவுக்கு துரோகமிழைக்கும் வகையில் செயட்பட்டுள்ளார்கள் என்று இம்ரான் மஹ்ரூப் எம்பி தெரிவித்துள்ளார். அவர் மேலும் கூறுகையில்; ஹக்கீமுக்கும் ரிஷாதுக்கும் அறிவித்துவிட்டு-பேசித் தீர்மானித்தே இவர்கள் வாக்களித்துள்ளனர்.இவர்கள் ஏதோவொரு நகர்வை மேற்கொள்கின்றனர். தொளபீக் எம்பி,பைசல் காசிம் எம்பி போன்றவர்கள் ஹக்கீமுக்கு விசுவாசமானவர்கள்.அவர்கள் தன்னிச்சையாக முடிவெடித்திருக்கமாட்டார்கள். இப்படி வாக்களித்தன்மூலம் சமூகம் அடைந்த நன்மை என்ன?குறைந்தது கொரோனாவால் மரணிக்கும் ஜனாஸாக்கள் எரிக்கப்படாது என்று ஜனாதிபதியிடம் உறுதி மொழியை பெற்றுவிட்டாவது வாக்களித்திருக்கலாம். சஜித்தை பயன்படுத்தி வெற்றிபெற்றுவிட்டு சஜித்துக்கு துரோகமிழைக்கும் வகையில் நடந்துகொள்கின்றனர்.இது பெரும்பான்மை மக்கள் எம்மை பிழையாக பார்க்க வைத்துவிட்டது. இது தொடர்பில் ஹக்கீம் விளக்கமளிக்க வேண்டும்-என்றார்.  

கொரோனா ஜனாஸாக்கள் நல்லடக்கம்:அரச தரப்பு எம்பி பொலிஸில் முறைப்பாடு

கொரோனாவால் உயிரிழக்கும் முஸ்லிம்களின் ஜனாஸாக்களை நல்லடக்கம் செய்வது தொடர்பாக பிழையான செய்திகளை பரப்புபவர்களுக்கு எதிராக நடவடிக்கை எடுக்குமாறு கோரி பொதுஜன பெறமுண எம்பி பிரேம்நாத் சி.தொலவத்த நேற்று பொலிஸ் தலைமையகத்தில் முறைப்பாடு செய்துள்ளார். அடக்கம் செய்வதற்கு அரசு இதுவரை எந்தவிதமான தீர்மானத்தையும் எடுக்காத நிலையில்,அரசு அடக்கம் செய்வதற்கு தீர்மானித்துவிட்டது சிலர் செய்திகளை பரப்புவதால் சமூகங்களிடையே தேவையற்ற விரிசல்கள் ஏற்படுகின்றன என்று அவர் தெரிவித்துள்ளார். இவ்வாறான செய்தி ஒன்றை சிலோன் தவ்ஹீத் ஜமாஅத் வெளியிட்டுள்ளது என்றும் இது தொடர்பிலும் பொலிஸ் விசாரணை செய்து நடவடிக்கை எடுக்க வேண்டும் என்றும் அவர் பொலிஸிடம் கோரிக்கை விடுத்துள்ளார்.

3 பிள்ளைகளின் தாய் வல்லுறவு: குற்றவாளிக்கு 22 வருட கடூழிய சிறை

மாத்தளை ,உக்குவளை பகுதியில் மூன்று பிள்ளைகளின் தாய் ஒருவரை பாலியல் வல்லுறவுக்கு உட்படுத்தி அவரிடம் இருந்து பணம் மற்றும் நகை உள்ளிட்ட பொருட்களை திருடிச் சென்ற குற்றவாளி ஒருவருக்கு மாத்தளை மேல் நீதிமன்ற நீதிபதி சுமுது பிரேமசந்த நேற்று 22 வருட கடூழிய சிறைத் தண்டனை வழங்கித் தீர்ப்பளித்தார். இந்தக் குற்றவாளியுடன் இணைந்து மேற்படி குற்றத்தை புரிந்த மேலும் இருவர் குற்றத்தை ஒப்புகொண்டதன் காரணமாக அவர்களுக்கு தலா 12 வருட சிறைத் தண்டனை வழங்கப்பட்டுள்ளது. இவர்கள் பொலிஸ் சீருடையில் கைத்துப்பாக்கி சகிதம் சென்று பொலிஸார்போல் நடித்தே இந்தக் குற்றத்தைப் புரிந்துள்ளனர். தனது மூன்று பிள்ளைகளுடன் இரவில் உறங்கிக்கொண்டிருந்த குறித்த பெண்ணை எழுப்பி வாக்குமூலம் ஒன்று பெற வேண்டும் என்று கூறி வேறு ஓர் இடத்துக்கு அழைத்துச் சென்றே அவரை பாலியல் வல்லுறவுக்கு உட்படுத்தியுள்ளனர். அந்தப் பெண்ணின் நகை மற்றும் பணத்தை திருடிய குற்றத்துக்காக 7வருட சிறைத்தண்டனையும் வழங்கி 10 ஆயிரம் ரூபா அபராதமும் விதித்தார் நீதிபதி. அபராதத் தொகையை செலுத்தத் தவறும் பட்சத்தில் அவர் அதற்காக 6 மாத சிறைத் தண்டனை அனுபவிக்க வேண்டும் என்றும் தீர்ப்பு வழங்கியுள்ளார். பாலியல் வல்லுறவு குற்றத்துக்காக 15 வருட கடூழிய சிறைத் தண்டனை வழங்கப்பட்டுள்ளது.மேலும்,பாதிக்கப்பட்ட பெண்ணுக்கு குற்றவாளி 3 லட்சம் ரூபா நட்டஈடாக வழங்க வேண்டும் என்றும் தீர்ப்பளித்துள்ளார்.மேலும்,25 ரூபா அபராதமும் விதித்தார். அந்த நட்டஈடான 3 லட்சம் ரூபாவை வழங்காவிட்டால் குற்றவாளி அதற்காக 2 வருட சிறைத்தண்டனையை அனுபவிக்க வேண்டும். அதேபோல்,25 ஆயிரம் ரூபா அபராத தொகையை செலுத்தாவிட்டால் அதற்காக 6 மாத சிறைத் தண்டனையை அனுபவிக்க வேண்டும் என்று நீதிபதி தீர்ப்பளித்தார். மாத்தளை களுதாவள பகுதியை வசிப்பிடமாகக்கொண்ட நபருக்கே இந்தத் தண்டனை வழங்கப்பட்டது. மொத்தமாக அவருக்கு வல்லுறவு மற்றும் திருட்டுக் குற்றத்துக்காக 22 வருட சிறைத் தண்டனை  வழங்கப்பட்டுள்ளது. மாத்தளை ,உக்குவளை உக்குவள வத்தை பகுதியை சேர்ந்த பெண்ணை மேற்படி குற்றவாளி மேலும் 2 நபர்களுடன் சேர்ந்து 2005 ஜூன் ,4 ஆம் திகதி பாலியல் வல்லுறவுக்கு உட்படுத்தி பணம்,நகைகளை கொள்ளையடித்தார். ஏனைய இரண்டு குற்றவாளிகளும் ஆரம்பத்திலேயே குற்றத்தை ஒப்புக்கொண்டதன் காரணத்தால் அவர்களுக்கு தலா 12 வருட சிறைத்தண்டனை வழங்கப்பட்டது. இந்தக் குற்றங்கள் அனைத்தும் நிரூபிக்கப்பட்டதைத் தொடர்ந்தே நேற்று 11 ஆம் திகதி இவர்களுக்கு மேற்படித் தீர்ப்பு வழங்கப்பட்டது.