இஸ்ரேலின் பேரிச்சம் பழம் பகிஷ்கரிப்பு 

இஸ்ரேலின் ஆக்கிரமிப்புப் பகுதியான பலஸ்தீனின் மேற்குக்கரை மற்றும் ஜோர்தான் பள்ளத்தாக்கு ஆகிய இடங்களில் உற்பத்தி செய்யப்படும் பேரிச்சம் பழங்களை புறக்கணிக்கும் நடவடிக்கைகள் ஆரம்பிக்கப்பட்டுள்ளன. அல்-அக்ஸா பள்ளிவாசலைப் பாதுகாக்கும் 'அல்-அக்ஸாவின் நண்பர்கள்' என்ற அமைப்பே இந்த நடவடிக்கையை முன்னெடுத்து வருகிறது. பிரிட்டனில் 30 லட்சம் முஸ்லிம்கள் வாழ்கின்றனர்.இது நோன்பு காலம் என்பதால் பேரித்தம் பழத்தின் தேவை அதிகரித்துள்ளது. அந்த நாட்டுக்கு ஏற்றுமதி செய்யப்படும் பேரித்தம் பழ ஏற்றுமதியாளர்களில் இஸ்ரேல் இரண்டாமிடத்தில் உள்ளது.   இந்தப் பழங்கள் எல்லாமே பலஸ்தீன முஸ்லிம்களிடம் இருந்து கைப்பற்றப்பட்ட நிலங்களில் பயிடப்பட்டவையாகும்.உலக முஸ்லிம்கள் இந்தப் பழங்களை வாங்குவதன் மூலம் பலஸ்தீன முஸ்லிம்களுக்கு எதிரான இஸ்ரேலின் அக்கிரமத்துக்குத் துணை போக வேண்டாம் என்று மேற்படி அமைப்பு கேட்டுக்கொண்டுள்ளது.

கொரோனாவை பரப்பியதே பாஜக தான்..

மேற்கு வங்கத்தில் கொரோனா பாதிப்பு மீண்டும் அதிகரித்துள்ளதற்கு பாஜகவே காரணம் எனக் குற்றட்டாட்டியுள்ள மம்தா,அனைவருக்கும் சரியான நேரத்தில் தடுப்பூசி செலுத்தப்பட்டிருந்தால் வைரஸ் பாதிப்பு அதிகரித்திருக்காது என்றும் தெரிவித்தார்.  மேற்கு வங்கத்தில் எட்டு கட்டங்களாகச் சட்டசபை தேர்தல் நடைபெறுகிறது.இதுவரை நான்கு கட்டமாகத் தமிழகத்தில் 135 தொகுதிகளில் வாக்குப்பதிவு நடைபெற்று முடிந்துள்ளது.அடுத்து ஐந்தாம் கட்ட தேர்தல் நாளை மறுநாள் நடைபெறுகிறது. மேற்கு வங்கத்தைப் பொறுத்தவரை திரிணாமுல் காங்கிரஸ் மற்றும் பாஜக ஆகிய கட்சிக்கு இடையே நேரடி போட்டி நிலவுகிறது.திரணாமுல் காங்கிரஸ் தொடர்ந்து மூன்றாவது முறையாக ஆட்சியைப் பிடிக்க வேண்டும் என்ற முனைப்பில் களமிறங்கியுள்ளது. இந்நிலையில்,பிரசார கூட்டம் ஒன்றில் பேசிய மம்தா பானர்ஜி,மேற்கு வங்கத்தில் கொரோனா பாதிப்பு மீண்டும் ஏற்பட பாஜகவே காரணம் என்று குற்றஞ்சாட்டினார். 

நோன்பு வைத்துக்கொண்டு களவில் தண்ணீர் குடித்திருக்கிறேன்

ரமழான் நோன்பு குறித்த தனது நினைவலைகளை பகிர்ந்துள்ளார் இயக்குநர் அமீர். 10 வயது முதல் ரமலான் மாதத்தில் நோன்பு நோற்று வருவதாகவும் 25 வயதுக்கு மேல் தான் நோன்பின் மாண்பையும், சிறப்பையும் உணர்ந்ததாகவும் கூறுகிறார். ''எனக்கு 10 வயது இருக்கும் என நினைக்கிறேன்.அப்போது முதல் ரமலான் மாதத்தில் நோன்பு நோற்று வருகிறேன்.அப்போதெல்லாம் எதற்காக நோன்பு வைக்கிறோம்.ரமலான் மாதத்தின் சிறப்புகள் என்ன என்பது பற்றியெல்லாம் எனக்கு எதுவும் தெரியாது.  அம்மா அதிகாலையில் எழுப்பிவிட்டு சஹர் உணவு கொடுப்பார்கள்.சாப்பிட்டுவிட்டு தூங்கிவிடுவேன். மீண்டும் பகலில் பசியெடுத்தவுடன் பசிக்குது,.பசிக்குது என வீட்டில் கூறுவேன்.'' ''அவர்களும் இன்னும் கொஞ்சம் நேரம்தான் இருப்பதாகக் கூறி என்னை சமாளிப்பார்கள்.ஒரு கட்டத்தில் வீட்டிற்கு தெரியாமல் தண்ணீர் கூட குடித்துவிடுவேன்.இதெல்லாம் 10 வயது முதல் 15 வயதிற்குள் நடந்த நிகழ்வுகள்.  அதேபோல் நோன்பு திறக்கும் நேரத்தில் (இஃப்தார்) பள்ளிவாசலுக்கு சென்று முதல் ஆளாக அமர்ந்துகொள்வேன்.'' ''இந்நிலையில் எனது தந்தை மறைவுக்கு பிறகு எனது வாழ்க்கை திசைமாறத் தொடங்கியது.கல்லூரிக் காலத்தில் தொழுவது,நோன்பு வைப்பது என எதையும் செய்யாமல் வாலிப வயதிற்கே உரிய தீயச் செயல்கள் பக்கம் திரும்பினேன்.  அது ஒரு காலம்.திடீரென ஞானோதயம் வந்த பிறகு மீண்டும் தொழுகையும்,நோன்பையும் கடைபிடித்ததோடு இஸ்லாத்தின் அடிப்படை கொள்கைகளை பற்றியும் தெரிந்துகொண்டேன்.'' ''நன்மையை ஏவி தீமையை தடுப்பவரே உண்மையான இஸ்லாமியர்.அதைவிடுத்து லுங்கி கட்டிக் கொள்வதாலும்,தாடி வைத்து தொப்பி போட்டுக் கொள்வதாலும் வரும் தோற்றத்தை வைத்து ஒருவரை உண்மையான இஸ்லாமியர் எனக் கூற இயலாது.யார் ஒருவர் பிறருக்கு தீங்கு நினைக்கவில்லையோ அவர் தான் உண்மையான முஸ்லீம்.'' ''இதனிடையே 1995-1996 காலகட்டத்தில் உதவி இயக்குநராக பணியாற்றுவதற்காக சென்னைக்கு வந்தேன். அப்போதெல்லாம் இப்போது உள்ளதுபோல் அதிகாலை 4 மணிக்கு சஹர் உணவு கிடைக்காது.இதனால் இரண்டு பிஸ்கெட் பாக்கெட் மற்றும் ஒரு டீயை வாங்கி வைத்துக் கொள்வேன்.அது தான் எனது சஹர் உணவு.'' ''ரமலான் என்றவுடன் மறக்கமுடியாத நிகழ்வுகளில் ஒன்று இது.ரம்ஜான் பண்டிகைக்காக எனக்கு அம்மா மதுரையில் துணி எடுத்துக் கொடுப்பார்.அதில் என்ன வேடிக்கை என்றால், பள்ளி யூனிபார்ஃம் தான் ரம்ஜான் புது டிரெஸ்.  ரம்ஜான் அன்று புது துணி போட்டது மாதிரியும் ஆச்சு, மற்ற நாட்களில் அதை பள்ளிக்கு பயன்படுத்துவது போலவும் ஆச்சு.சட்டையையாவது மாற்றி எடுத்துக் கொடுங்க என்று நான் அம்மாவிடம் சண்டை போட்டிருக்கிறேன்.'' ''இன்று கால ஓட்டத்தில் எல்லாம் மாறிவிட்டது.எனக்கு இன்று எவ்வளவு வசதி வாய்ப்புகள் வந்திருந்தாலும் கூட நான் இப்தார் நேரத்தில் (மாலை நோன்பு திறக்கும் நேரத்தில்) நோன்பு கஞ்சியைக்க கொண்டுதான் நோன்பு திறப்பேன். நோன்பு கஞ்சிக்கு ஈடு இணை எதுவுமே இல்லை, அதை பருகும் போது கிடைக்கும் மகிழ்ச்சி தனித்துவமானது.'' 'இசையமைப்பாளர் ஏ.ஆர்.ரஹ்மான் ஆண்டுதோறும் ரமலான் மாதத்தில் நோன்புக் கஞ்சி விநியோகம் செய்வார்.நானும் அவர் வீட்டிலிருந்துதான் கடந்த 10 வருடங்களாக நோன்புக் கஞ்சி வாங்கினேன்.இது அவருக்கே தெரியாது என நினைக்கிறேன்.கொரோனா பரவல் காரணமாக கடந்தாண்டும், இந்தாண்டும் மட்டும் எங்கள் வீட்டிலேயே நோன்புக் கஞ்சி தயாரித்துக் கொள்கிறோம்.'' ''இதேபோல் ரமலான் என்றாலே ஸக்காத் (தானம் செய்வது)என்பது இஸ்லாமியர்களுக்கு மற்றொரு முக்கியமான கடமை. நான் ரமலான் மாதம் வரட்டும் எனக் காத்திருக்கமாட்டேன். எனக்கு எப்போது எல்லாம் வருவாய் வருகிறதோ அப்போதெல்லாம் தானம் செய்வதற்கென குறிப்பிட்ட தொகையை எடுத்துவைத்து விட்டுத்தான் மற்ற பணிகளை பார்ப்பேன்''.  -எனக் கூறி ரமலான் மாதம் குறித்த தனது நினைவலைகளை பகிர்ந்தார் இயக்குநர் அமீர்.

ஆகாயத்தில் இருந்தவாறே விமானங்களை தாக்கும் ஏவுகணைகள் இப்போது துருக்கிலும் 

ஆகாயத்தில் இருந்தவாறே விமானங்களைத் தாக்கும் ஏவுகணைகளைக் கொண்டசில  நாடுகளுள் துருக்கியும் ஒன்றாக இப்போது மாறியுள்ளது. அந்த நாடு இந்த வகை ஏவுகணைகளை இப்போது தயாரித்து வருகிறது.இதை அந்நாட்டு ஜனாதிபதி ஆதுர்கான் இன்று புதன் கிழமை பெருமையுடன் அறிவித்தார். அத்தோடு,ஆகாயத்தில் இருந்தவாறே தாக்குதல் நடத்தும் வீடியோ காட்சியையும் அவர் வெளியிட்டார்.

கொஹ்லியை வீழ்த்தி உலகின் முதலிடத்துக்கு வந்தார் பாபர் 

பாகிஸ்தான்-தென் ஆப்பிரிக்கா தொடர் நிறைவுற்றதைத் தொடர்ந்து பாகிஸ்தான் கிரிக்கட் அணியின்  கப்டன் பாபர் அஸாம் ஒரு நாள் ஆட்டத்தில் உலகின் முதல் தர ஆட்ட நாயகனாக ICC ஆல் தெரிவு செய்யப்பட்டுள்ளார். இதன்மூலம் முதலிடத்தில் இருந்து வந்த இந்திய அணியின் கப்டன் விராத் கோலி இரண்டாம் இடத்துக்குத் தள்ளப்பட்டுள்ளார். தென் ஆப்பிரிக்காவுடனான தொடரைத் தொடர்ந்தே பாபர் அஸாம் இவ்வாறு முதலாமிடத்துக்கு வந்துள்ளார். தென் ஆப்பிரிக்காவுடனான மூன்று போட்டிகளிலும் விளையாடி அவர் 228 ஓட்டங்களை பெற்றார். இந்தப் போட்டியில் கலந்துகொள்வதற்கு முன் அவர் கோலியைவிட 20 புள்ளிகள் குறைவாகவே பெற்றிருந்தார். மூன்று போட்டிகளின் நிறைவில் அவர் அவர் கோலியைப் பின்தள்ளி முன்னுக்கு வந்தததோடு கோலியைவிட 8 புள்ளிகள் அதிகமாக பெற்றார்.பாபர் அசாம் மூன்று போட்டிகளிலும் பெற்ற மொத்த புள்ளிகள் 28 ஆகும். ஏற்கனவே முதலாமிடத்தில் இருந்த டீவில்லியர்ஸை 2017 இல் பின்னுக்குத் தள்ளி கோலி முதலாமிடத்துக்கு வந்தமை குறிப்பிடத்தக்கது. பாபர் அஸாம் டெஸ்ட் தரவரிசையில் 6 ஆம் இடத்திலும் T 20 இல் மூன்றாம் இடத்திலும் உள்ளமை குறிப்பிடத்தக்கது.                

ரணிலுக்கு இன்று 72 

முன்னாள் பிரதமர் ரணில் விக்ரமசிங்க இன்று  [24] 72 ஆவது பிறந்த நாளைக் கொண்டாடுகிறார். 4 தடவைகள் எம்பியாகவும் தொடர்ச்சியாக 43 வருடங்கள் எம்பியாகவும் இருந்தவர் என்பது குறிப்பிடத்தக்கது.

17 முஸ்லிம் எம்பிக்களுக்காகவே ரணில் என்னை அமைச்சுப் பதவியில் இருந்து நீக்கினார்.

தான் வஹாபிஸ தீவிரவாதம் பற்றிக் கூறியதால் அப்போது இருந்த 17 முஸ்லிம் எம்பிக்கள் என்னை எதிர்த்தனர்.அவர்களுக்காக-முஸ்லிம்களின் வாக்குகளை பெறுவதற்காக ரணில் என்னை அமைச்சுப் பதவியில் இருந்து நீக்கினார் என்று நாடாளுமன்ற உறுப்பினர் விஜயதாச ராஜபக்ஸ தெரிவித்துள்ளார். நேற்று மீரிகமவில் இடம்பெற்ற நிகழ்வொன்றில் கலந்துகொண்டு உரையாற்றும்போதே இவ்வாறு கூறினார்.அவர் அங்கு மேலும் கூறுகையில், முஸ்லிம் சிறுவர்களுக்கு தீவிரவாதம் போதிக்கப்படுகிறது.இது நாட்டுக்கு பேராபத்தை ஏற்படுத்தும்.நாடு பயங்கரவாத அச்சுருத்தலை எதிர்நோக்கும். 70 களில் அப்போதைய கல்வி அமைச்சர் பதியுதீன் முஹம்மட் முஸ்லிம்களுக்கென்று தனியான பாடசாலைகளை அமைத்தார்.அதுவரை தமிழ்,முஸ்லீம்,சிங்களம் மாணவர்கள் ஒன்றாகவே கல்வி கற்றனர்.பதியுதீன் முஹம்மட் தனியான பாடசாலைகளை அமைத்ததால் முஸ்லீம் மாணவர்கள் பிரிந்து சென்று முஸ்லீம் பாடசாலைகளில் கல்வி கற்கத் தொடங்கினர். 2019 மார்ச் அளவில் ஸஹ்ரான் 6 பாடசாலைகளை நிறுவினார்.அதில் மாணவர்களுக்கு பயங்கரவாதம் போதிக்கப்பட்டது. 2016 ஒக்டொபர் 18 இல் வஹாபிஸ பயங்கரவாதம் தொடர்பில் நான் நாடாளுமன்றில் குரல் எழுப்பினேன்.அன்றில் இருந்து நான் பயங்கரவாதியாக பார்க்கப்பட்டேன். எனது குற்றச்சாட்டை நிரூபிப்பதற்கு 2 வருடங்களும் 5 மாதங்களும் காத்திருக்க வேண்டியேற்பட்டது.ஈஸ்டர் தாக்குதல் எனது குற்றச்சாட்டு உண்மை என்று நிரூபித்துள்ளது.இப்படியொரு தாக்குதல் நடக்கும் என்று நான் அப்போதே கூறி இருந்தேன். வஹாபிஸ பயங்கரவாதம் ஒன்று இல்லையென்று அன்று நாடாளுமன்றில் குரல் எழுப்பிய ஹிஸ்புல்லாஹ்,முஜிபுர் ரஹ்மான்,றிசாத் பதியுதீன் மற்றும் ராஜித சேனாரத்ன ஆகியோர் இப்போது என்ன சொல்லப் போகிறார்கள்? நான் இந்தக் குற்றச்சாட்டை முன்வைத்தமைக்காக 17 முஸ்லிம் எம்பிக்கள் என்னை எதிர்த்தனர்.இவர்களுக்காகவே ரணில் என்னை அமைச்சில் இருந்து நீக்கினார். ரணில் நாட்டை விடவும் முஸ்லிம் வாக்குகளையே மதித்தார்.இதனால்தான் என்னை அமைச்சுப் பதவியில் இருந்து நீக்கினார்.என்றார்.

அசாத் சாலி இன்று கைதாகலாம் 

நாட்டின் சட்டம் தொடர்பில் சர்ச்சைக்குரிய கருத்துக்களை வெளியிட்டார் என்று கூறி அசாத் சாலி இன்று சிஐடியினரால் கைது செய்யப்படலாம் என்று பொலிஸ் வட்டாரத்தில் தெரிவிக்கப்படுகிறது. அவரது கருத்துத் தொடர்பில் விசாரணை நடத்துவதற்காக சிஐடியால் 5 பேர் கொண்ட குழுவொன்று நியமிக்கப்பட்டுள்ளது.அவர்மீதான விசாரணை இடம்பெறுகிறது. அவர் இன்று கைது செய்யப்படலாம் எனத் தெரிய வருகிறது.தான் கைதுக்கு அஞ்சவில்லை என்றும் நாட்டின் சட்டத்துக்கு எதிராக எந்தவொரு கருத்தும் தெரிவிக்கவில்லை என்றும் அசாத் சாலி தெரிவித்துள்ளார்.

நான் கூறியது சரியே

எங்கள் சட்டம் எங்களுக்கு.உங்கள் சட்டம் உங்களுக்கு என்று தான் கூறிய கூற்றில் எதுவித தவறும் இல்லை என்று அசாத் சாலி தெரிவித்துள்ளார்.அவர் ஊடகங்களுக்கு மேலும் கூறுகையில், நான் இந்த நாட்டின் சட்டத்தை அவமதிக்கவில்லை.முஸ்லிம்களாகிய நாங்கள் குர்ஆன்,ஹதீஸ் அடிப்படையிலான எமது சட்டத்தை மதிக்கிறோம். அதுபோல்,சிங்களவர்களுக்கும் தனியான சட்டம் உண்டு.அந்தச் சட்டம் அவர்களுக்கு.எங்கள் சட்டம் எங்களுக்கு.இவ்வாறு நான் கூறியதில் என்ன பிழை இருக்கிறது. இதுதானே உண்மை.சிங்களவர்கள் அவர்களின் சட்டத்தைப் பின்பற்றுகிறார்கள்.முஸ்லிம்கள் முஸ்லிம்களின் சட்டத்தைப் பின்பற்றுகிறார்கள்.இதைத்தான் நான் சொன்னேன்.என்றார்.

ஷரிஆ சட்டம் வேண்டுமா? சவூதிக்குச் செல்லுங்கள் 

அசாத் சாலிக்கு ஷரிஆ சட்டம் தேவை என்றால் அவர் சவூதிக்குச் சென்று வாழட்டும் என்று அமைச்சர் சரத் வீரசேகர தெரிவித்துள்ளார். இந்த நாட்டின் சட்டம் தொடர்பில் அவர் கூறிய கருத்துக்கள் பாரதூரமானது.அவர் உடனடியாகக் கைது செய்யப்பட வேண்டும் என்று அவர் மேலும் கூறினார். ''எவராக இருந்தாலும் இந்த நாட்டின் சட்டத்தை மதிக்க வேண்டும்.சட்டத்தை அவமதிக்க முடியாது.அவ்வாறு அவமதிப்பவர்கள் தண்டனைக்கு உரியவர்கள்.'' என்றார்.  இது தொடர்பில் ஊடகங்களுக்கு கருத்துத் தெரிவிக்கும்போதே இவ்வாறு கூறினார்.

அசாத் சாலி கைது செய்யப்படுவாரா?:சிஐடி விசாரணை ஆரம்பம் 

இந்த நாட்டின் சட்டம் தொடர்பில் அசாத் சாலி தெரிவித்த கருத்துத் தொடர்பில் சிஐடியினர் விசாரணையைத் தொடங்கியுள்ளனர். சிஐடியின்  ஐந்து பேர் கொண்ட குழு இந்த விசாரணையை ஆரம்பித்துள்ளதாக பிரதி பொலிஸ்மா அதிபர் அஜித் ரோஹன தெரிவித்துள்ளார். அசாத் சாலிக்கு எதிராக பல முறைப்பாடுகள் கிடைக்கப்பெற்றுள்ளன என்று அவர் மேலும் கூறினார். இதேவேளை,கைதுக்கு அஞ்சப்போவதில்லை என்று அசாத் சாலி கூறியுள்ளமை குறிப்பிடத்தக்கது.

அப்துல் கலாமின் சகோதரர் மரணம் 

அப்துல் கலாமின் மூத்த சகோதரர் முகமது முத்து மீரான் மரைக்காயர் அவரது இல்லத்தில் நேற்று [07.03.201] காலமானார்.அவருக்கு வயது 104.ராமநாதபுரம் மாவட்டம் ராமேஸ்வரத்தைச் சேர்ந்தவர்.இவர் 1916 ஆம் ஆண்டு நவம்பர் மாதம் பிறந்தார். அப்துல் கலாமைபோல் இவரும் எளிமையான வாழ்க்கையை வாழ்ந்து வந்தார்.அவரது ஜனாஸா நல்லடக்கம் இன்று இடம்பெறும்.

ரஞ்ஜனுக்கு 3 மாத விடுமுறை 

சிறைத் தண்டனை அனுபவித்து வரும் ஐக்கிய மக்கள் சக்தியின் எம்பி ரஞ்ஜன் ராமநாயக்க நாடாளுமன்றம் வராதிருப்பதற்காக ஐக்கிய மக்கள் சக்தி மூன்று மாத விடுமுறையைக் கோருவதற்குத் திட்டமிட்டுள்ளது. நாளை மறுதினம் நாடாளுமன்றம் கூடும்போது எதிர்க்கட்சியின் பிரதம கொறடா லக்ஸ்மன் கிரியில்ல இந்த விடுமுறைக்கான அனுமதியை சபாநாயகரிடம் கோரவுள்ளார்.

குழந்தைக்கு அடித்த தாய்க்கு 20 வருட சிறை? 

8 மாதக் குழந்தையைத் தாக்கிய குற்றச்சாட்டில் கைது செய்யப்பட்டுள்ள பெண்ணின் குற்றச்சாட்டு நிரூபிக்கப்பட்டால் அவருக்கு 20 வருட சிறைத் தண்டனை விதிக்கப்படலாம் என்று பொலிஸார் தெரிவிக்கின்றனர். தண்டனைச் சட்டத்தின் 300,308 மற்றும் 308ஏ பிரிவின்கீழ் கொலை முயற்சி மற்றும் சிறுவர் கொடுமை அடிப்படையில் வழக்குத் தாக்கல் செய்யப்பட முடியும் என்று பொலிஸ் ஊடகப் பேச்சாளர் பிரதி பொலிஸ்மா அதிபர் அஜித் ரோஹன தெரிவித்தார். யாழ்.மணியந்தோட்டத்தைச் சேர்ந்த குறித்த பெண் நேற்று நல்லூர் பொலிஸாரால் கைது செய்யப்பட்டமை குறிப்பிடத்தக்கது.

பெண்ணின் தலை எங்கே? தேடிவரும் பொலிஸார் 

தலை துண்டிக்கப்பட்டு கொழும்பு டாம் வீதியில் சடலமாகப் போடப்பட்ட பெண் யார் என்று பொலிஸார் அடையாளம் கண்டுள்ளபோதிலும் அவரது தலையைப் பொலிஸார் இன்னும் கண்டுபிடிக்கவில்லை. அவரைக் கொலை செய்தவரும் உயிரிழந்துள்ளதால் இந்தப் பெண்ணின் தலையைக் கண்டுபிடிப்பதில் சிரமம் ஏற்பட்டுள்ளது. இருந்தும்,பொலிஸார் தலையைத் தேடித் தீவிர தேடுதல் வேட்டையை முடக்கிவிட்டுள்ளனர் என்று பொலிஸ் ஊடகப் பேச்சாளர் சிரேஷ்ட பொலிஸ் அத்தியேட்சகர் அஜித் ரோஹன தெரிவித்துள்ளார்.

பெண்ணின் தலையைத் துண்டித்த சப்-இன்ஸ்பெக்டர் தற்கொலை 

கொழும்பு – டாம் வீதி,ஐந்துலாம்பு சந்தி பகுதியில் பயணப் பையில் பெண்ணொருவரின் சடலத்தை வைத்து தலைமறைவான உப பொலிஸ் பரிசோதகர் படல்கும்புர ஐந்தாம் கட்டை பகுதியில் சடலமாக மீட்கப்பட்டுள்ளார். பொலிஸ் ஊடகப் பேச்சாளர்  பிரதி பொலிஸ்மா அதிபர்  அஜித் ரோஹண இதனை தெரிவித்துள்ளார். அத்துடன், பிரேத பரிசோதனைகள் இன்று இடம்பெறவுள்ளதுடன், அதன் பின்னர் மரணத்துக்கான காரணம் தெரியவரும் என்றும் அவர் குறிப்பிட்டுள்ளார். சந்தேக நபரை கைதுசெய்ய சென்ற போது, அவர் நேற்று தனது வீட்டிலிருந்து தப்பிச்சென்ற நிலையில் இன்று காலை மரத்தில் தொங்கிய நிலையில் சடலமாக மீட்கப்பட்டுள்ளதாக அவர் சுட்டிக்காட்டியுள்ளார். அவரது அருகில் விஷ போத்தல் ஒன்றும் இருந்தது என்று அவர் மேலும் தெரிவித்துள்ளார். அத்துடன், 52 வயதான குறித்த நபர், புத்தல பொலிஸ் நிலையத்தின் உப பொலிஸ் பரிசோதகரென கண்டறியப்பட்டுள்ளது.

அடையாளம் காணப்பட்டார் 

கொழும்பு – டாம் வீதி, ஐந்துலாம்பு சந்தி பகுதியில் பயணப் பையில் மறைத்துவைக்கப்பட்ட நிலையில் சடலமாக மீட்கப்பட்ட பெண் அடையாளம் காணப்பட்டுள்ளார். குருவிட்டை பகுதியைச் சேர்ந்த 30 வயதான பெண்ணொருவரே இவ்வாறு சடலமாக மீட்கப்பட்டுள்ளதாக பொலிஸ் ஊடகப் பேச்சாளர்  பிரதி பொலிஸ்மா அதிபர்  அஜித் ரோஹண தெரிவித்துள்ளார். அத்துடன், குறித்த பெண்ணுடையது என சந்தேகிக்கப்படும் புகைப்படத்தையும் பொலிஸார் வெளியிட்டுள்ளனர்.

ஜனாஸா அடக்கம்:மேலும் தாமதிக்கலாம் 

கொரோனா ஜனாஸாக்களை இரணைதீவில் நல்லடக்கம் செய்யும் அரசின் தீர்மானத்துக்கு அப்பகுதி மக்கள் எதிர்ப்புத் தெரிவித்து வருவதால் தற்போது பிரேத அறைகளில் வைக்கப்பட்டுள்ள ஜனாஸாக்களை அடக்கம் செய்வதில் மேலும் தாமதம் ஏற்படக்கூடிய நிலை ஏற்பட்டுள்ளது. இதனால் மீண்டும் அடுத்த இடத்தைத் தெரிவு செய்யும்வரை இருக்கின்ற ஜனாஸாக்களை எரித்துவிடுவார்களோ என்ற அச்சமும் முஸ்லிம்களுக்கு ஏற்பட்டுள்ளது. இதனால் இந்த ஜனாஸாக்களை மேலும் தாமதப்படுத்தாது முஸ்லிம்களின் இடங்களில் அடக்கம் செய்வதற்கு அரசு விரைந்து நடவடிக்கை எடுக்க வேண்டும் என்று முஸ்லிகள் கோரிக்கை விடுக்கின்றனர்.