சஜித்துக்கு இன்று 54

Tue, 12 Jan 2021 10:00:06 +0530

எதிர்கட்சித் தலைவர் சஜித் பிரேமதாசா இன்று அவரது 54ஆவது பிறந்த தினத்தைக் கொண்டாடுகிறார். 1994 இல் ஹம்பாந்தோட்டையில் இருந்து தனது அரசியல் பயணத்தைத் தொடங்கிய அவர் அதன் பின்னரான அனைத்து நாடாளுமன்றத் தேர்தல்களிலும் வெற்றிபெற்று ஐக்கிய தேசிய கட்சியின் பிரதி தலைவராக முன்னேறினார். 2019 ஜனாதிபதி தேர்தலில் ஐக்கிய மக்கள் சக்தியின் சார்பில் போட்டியிட்டு தோல்வியடைந்தார்.தற்போது எதிர்கட்சித் தலைவராக உள்ளார்.    

13 மற்றும் 15 ஆம் திகதிகளில் எம்பிக்களுக்கு PCR பரிசோதனை

Tue, 12 Jan 2021 09:31:05 +0530

அமைச்சர்கள் தயாசிறி ஜயசேகர,வாசுதேவ நாணயக்கார மற்றும் ரவூப் ஹக்கீம் எம்பி ஆகியோர்க்கு கொரோனா தொற்று உறுதி செய்யப்பட்டுள்ளதைத் தொடர்ந்து நாடாளுமன்ற எம்பிக்கள் மற்றும் நாடாளுமன்ற ஊழியர்கள் ஆகியோர்க்கு PCR பரிசோதனை செய்யப்படவுள்ளது. 13 மற்றும் 15 ஆம் திகதிகளில் நாடாளுமன்றில் இந்த சோதனை மேற்கொள்ளப்படும் என்று நாடாளுமன்ற படைக்கல சேவிதர்  நரேந்திர பெர்னாண்டோ தெரிவித்துள்ளார். தங்களை  PCR பரிசோதனைக்கு உட்படுத்த விரும்பும் எம்பிக்கள் இந்த தினங்களில் நாடாளுமன்றத்துக்கு வரமுடியும் என்று அவர் தெரிவித்துள்ளார். 

உயிர் தப்புவதற்காக சிறை செல்லும் பாதாள குழுத் தலைவர்கள் 

Wed, 06 Jan 2021 10:13:26 +0530

அதிகமான பாதாள குழுக்களின் செயற்பாடுகளும் போதைப் பொருள் வர்த்தகமும் சிறையில் இருந்துதான் முன்னெடுக்கப்படுகின்றன என்று எஸ்.பி.திஸாநாயக்க எம்பி நேற்று கூறினார்.  பாதாள குழுத் தலைவர்கள்  உயிர் தப்புவதற்காகவே சிறை செல்கிறார்கள் என்று கூறிய அவர் அங்கிருந்துகொண்டு உயிரையும் பாதுகாத்துக்கொண்டு குற்றச் செயல்களையும் முன்னெடுத்து வந்தனர்.இப்போது அந்த நிலை மாறிவிட்டது என்றார். எமது ஜனாதிபதி போதை பொருள் வர்த்தகத்தையும் பாதாள குழுக்களையும் முற்றாக ஒழித்து வருகிறார் என்று அவர் மேலும் கூறினார்.

தேவை ஏற்பட்டால் பார்ப்போம்    

Wed, 06 Jan 2021 09:43:26 +0530

எம்பியாகும் எண்ணம் எதுவும் இப்போதைக்கு இல்லை என்று தெரிவித்துள்ள பசில் ராஜபக்ஸ எதிர்காலத்தில் அதற்கான தேவை ஏற்பட்டால் பார்ப்போம் என்று கூறியுள்ளார். இது தொடர்பில் அவரிடம் மீண்டும் ஒரு தடவை கேள்வி எழுப்பியபோதே இவ்வாறு கூறினார்.இப்படியே இருந்தவாறு மக்களுக்கு சேவை செய்வது தனக்குப் பிடித்துள்ளது என்றும் அவர் கூறினார். சுதந்திரக் கட்சிக்கும் பொதுஜன பெரமுனவுக்கும் இடையில் ஏற்பட்டுள்ள முறுகல் நிலைபற்றி அவரிடம் கேட்டபோது அப்படி எதுவுமில்லை என்று பதிலளித்தார். சு.கவை தாம் ஒருபோதும் ஒதுக்கவில்லை என்றும் மாற்றான் தாய் மனப்பான்மையுடன் நடத்தவில்லை என்றும் பசில் கூறினார். 

கொரோனா பரிசோதனையில் குழப்பம்:  உறவினரிடம் ஒப்படைக்கப்பட்ட சடலம்: பின்பு நடந்ததைப் பாருங்கள்

Wed, 06 Jan 2021 06:16:40 +0530

கொரோனா தொற்றுக்கு உள்ளாகி இருந்த நிலையில்,மரணித்த ஒருவரின் உடலை வீட்டுக்கு எடுத்துச் சென்ற சம்பவம் ஒன்று நேற்று குருநாகலில் இடம்பெற்றது. கொரோனா பரிசோதனையில் ஏற்பட்ட குழப்பமே இதற்குக் காரணம் எனத் தெரியவருகிறது.இதுபற்றி மேலும் தெரிய வருவதாவது; இதய நோய் காரணமாக குருநாகல் பண்ணல பகுதியைச் சேர்ந்த 76 முதியவர் ஒருவர் 2 ஆம் திகதி வைத்தியசாலையில் சேர்க்கப்பட்டார்.அவர் நேற்று 5 ஆம் திகதி மரணித்தார். அவர் வைத்தியசாலையில் சேர்க்கப்படும்போது அவருக்கு PCR  மற்றும் அன்டிஜென் ரெபிட் சோதனைகள் செய்யப்பட்டன. அவருக்கு கொரோனா தொற்று இல்லை என்று அன்டிஜென் அறிக்கை கூறியது.இந்த நிலையில்,அவர் நேற்று மரணித்தார்.இதனால்,நேற்றே அவரது உடல் உறவினர்களிடம் ஒப்படைக்கப்பட்டது. அவரது உடல் ஒப்படைக்கப்பட்ட பின்புதான் PCR அறிக்கை வந்தது.அதில் அவருக்கு கொரோனா தொற்று இருப்பது தெரிய வந்தது.இதனால்,அவரது வீட்டுக்குச் சென்ற சுகாதார அதிகாரிகள் சடலத்தை தகனம் செய்ததோடு அந்த மரண வீட்டுக்குச் சென்றிருந்த 180 பேரை தனிமைப்படுத்தினர்..  கொரோனா இல்லை என்று அன்டிஜென் கூறுகிறது. ஆனால்,கொரோனா உள்ளது என்று PCR கூறுகிறது. 

ஜனாஸா நல்லடக்கம்:கிறிஸ்தவ அமைப்புகளுக்கு மௌலானா பாராட்டு 

Tue, 05 Jan 2021 10:58:20 +0530

கொரோனாவால் உயிரிழக்கும் முஸ்லிம்களின் ஜனாஸாக்களை அடக்கம் செய்வதற்கு கிறிஸ்தவ அமைப்புக்கள் ஆதரவு தெரிவித்துள்ளமைக்காக முன்னாள் எம்பி அலி சாஹிர் மௌலானா பாராட்டுக்களைத் தெரிவிட்டுள்ளார். இவர்களின் இந்த ஆதரவு ஜனாஸா  தொடர்பான எமது ஜனநாயகரீதியான போராட்டத்துக்கு வலு சேர்க்கின்றது என்று அவர் மேலும் கூறியுள்ளார்.  தேசிய கிறிஸ்தவ கூட்டமைப்பு மற்றும் சமூக மற்றும் சமயத்துக்கான மத்திய நிலையம் ஆகிய அமைப்புகள்  கொரோனாவால் உயிரிழக்கும் முஸ்லிம்களின் உடல்களை நல்லடக்கம் செய்வதற்கு அனுமதி வழங்குமாறு ஜனாதிபதியிடம் வேண்டுகோள் விடுத்துள்ளன. இதற்காகவே மௌலானா இந்த அமைப்புகளுக்கு நன்றியையும் பாராட்டையும் தெரிவித்துள்ளார். 

முகக் கவசம் அணியாதோர் கைது:இன்று முதல் தீவிரம்:கட்டாய PCR 

Tue, 05 Jan 2021 08:35:49 +0530

முகக் கவசம் அணியாதோரை கைது செய்யும் நடவடிக்கை இன்று முதல் தீவிரப்படுத்தப்படும் என்று பிரதி பொலிஸ்மா அதிபர் அஜித் ரோஹன தெரிவித்துள்ளார். அவர்களுக்கு எதிராக தனிமைப்படுத்தல் சட்ட விதிமுறைகளை மீறிய குற்றச்சாட்டின் கீழ் வழக்குப் பதிவு செய்யப்படுவதோடு கட்டாய PCR அல்லது அன்டிஜன் பரிசோதனைக்கு உட்படுத்தப்படுவர் என்றும் அவர் கூறியுள்ளார். 

அத்துரலிய நாடாளுமன்றில் இன்று சத்தியப்பிரமாணம் !

Tue, 05 Jan 2021 06:20:40 +0530

எமது மக்கள் சக்தியின் தேசிய பட்டியலின் ஊடாக நாடாளுமன்றம் நுழைந்துள்ள அத்துரலிய ரத்ன தேரர் இன்று நாடாளுமன்றில் எம்பியாக சத்தியப்பிரமாணம் செய்துகொண்டார்  அந்தக் கட்சிக்கு கிடைத்துள்ள ஒரேயொரு தேசிய பட்டியலுக்காக இவருக்கும் ஞானசார தேரருக்கும் இடையில் பல மாதங்களாகக் கடும் போட்டி நிலவி இறுதியில் அத்துரலியவுக்கே அந்தக் கட்சி எம்பி பதவியை வழங்கியமை குறிப்பிடத்தக்கது. அத்துரலிய 2004 இல் இருந்து இப்போதுவரை நான்கு தடவைகள் [2004,2010,2015,2020] எம்பியாக பதவி வகித்து வருகிறார்.

Facebook காதலால் 15 வயது மாணவி கர்ப்பம் 

Fri, 25 Dec 2020 10:37:19 +0530

Facebook காதலால் 15 வயது மாணவி ஒருவர் கர்ப்பம் தரித்த சம்பவம் ஒன்று மஹரகம பகுதியில் இடம்பெற்றுள்ளது. பாடசாலை விடுமுறை காரணமாக ஒன்லைன்மூலம் கல்வி பயில்வதற்காக குறித்த மாணவியின் தந்தை 4 மாதங்களுக்கு முன் மாணவிக்கு கையடக்கத் தொலைபேசி ஒன்றை வாங்கி கொடுத்துள்ளார். ஒன்லைனில் படிக்கும் அதே நேரம் Facebook கணக்கொன்றை திறந்து நண்பர்களுடன் அரட்டையடித்து வந்துள்ளார்.அப்படியே ஒரு இளைஞனுடன் காதலும் ஏற்பட்டுள்ளது அந்த மனைவிக்கு. ஓகஸ்ட் முதலாம் திகதி தனியார் வகுப்புக்குச் சென்ற மாணவி அந்த காதலனை சந்திக்க காதலனோ மாணவியை ஒரு வீட்டுக்கு அழைத்துச் சென்று 3 நாட்கள் தங்கியுள்ளான். அப்போது அந்த மாணவியை பாலியல் துஸ்பிரயோகத்துக்கும் உட்படுத்தியுள்ளான்.இந்த நிலையில்,மகளை காணவில்லை என்று பெற்றோர் பொலிஸில் முறைப்பாடும் செய்தனர். மூன்று நாட்கள் கழித்து அவன் மாணவியை அழைத்துக்கொண்டு மாணவியின் வீட்டுக்குச் சென்றதும் மாணவியின் பெற்றோர் எதிர்ப்புத் தெரிவித்தனர். இதனால்,அவன் மீண்டும் மாணவியை அழைத்துக்கொண்டு சென்று ஒரு வீட்டில் தங்கினான்.இதனால்.மாணவி கர்ப்பமடைந்தாள். காதலன் அவளைக் கொடுமைப்படுத்தியதும் மாணவி பெற்றோரிடம் வந்து விடயத்தைக் கூறினாள்.மாணவியை அழைத்துச் சென்று பெற்றோர் பொலிஸில் முறைப்பாடு செய்ததும் அவன் கைது செய்யப்பட்டு நுகேகொட நீதிமன்றில் ஆஜர்படுத்தப்பட்டான்.அவனுக்கு நீதிமன்றம் பிணை வழங்கியது.  

சுயதனிமைப்படுத்தலில் பூனை! பிலியந்தலையில் சம்பவம் 

Fri, 25 Dec 2020 09:48:18 +0530

தன்னை வளர்த்து வந்த வீட்டார் கொரோனா தொற்று காரணமாக வைத்தியசாலையில் சேர்க்கப்பட்டதால் அந்த வீட்டின் பூனை ஒன்று மூன்று நாட்களாக உணவு,தண்ணீர் இன்றி வீட்டுக்குள்ளேயே சுய தனிமைப்படுத்தலில் இருந்த சம்பவம் ஒன்று பிலியந்தளவில் இடம்பெற்றுள்ளது. இதை அறிந்த பொலிஸாரும் பொது சுகாதார அதிகாரிகளும் நேற்று முந்தினம் பூனையை வெளியே எடுத்து அதற்க்கு உணவு கொடுத்துள்ளதோடு வேறு பூனை ஒன்றுடன் அதை இணைத்துவிட்டனர். அந்த வீட்டில் வசித்து வந்த ஒரே குடும்பத்தைச் சேர்ந்த மூவருக்கு கொரோனா தொற்று ஏற்பட்டதைத் தொடர்ந்து அவர்கள் வைத்தியசாலையில் சேர்க்கப்பட்டனர்.இதனால் அந்தப் பூனை மூன்று நாட்களாக உணவின்றி வாடியது. அந்த வீட்டார் தமது பூனை இவ்வாறு வீட்டுக்குள் அடைபட்டுக் கிடக்குகின்றமை தொடர்பில் அந்த வீட்டார் பொது சுகாதார பரிசோதகர்களுக்கு தொலைபேசி மூலம் அறிவித்தனர். பொது சுகாதார பரிசோதகர்கள் பொலிஸாருக்கு அறிவித்து அவர்களும் பொலிஸாரும் இணைந்து சென்று பூனைக்கு உணவு கொடுத்துள்ளனர். வீட்டார் சுகமடைந்து வீட்டுக்கு வரும்வரை இந்த பூனையை பராமரிக்குமாறு அவர்கள் அயலவர்களிடம் கூறிச் சென்றனர்.

குழந்தைங்களின் பசியைப் போக்குவதற்காகத் திருடிய தந்தை

Fri, 25 Dec 2020 09:16:34 +0530

பட்டினியால் வாடும் தனது பிள்ளைகளின் பசியைத் தீர்ப்பதற்காகதந்தை ஒருவர் பணம் திருடிய சம்பவம் ஒன்று கம்பொலவில் இடம்பெற்றுள்ளது. கூலித் தொழிலாளியான அந்த நபர் கீழே வீழ்ந்து கால் முறிந்துள்ளதால் அந்தக் காலில் சத்திர சிகிச்சை மேற்கொள்ளப்பட்டுள்ளது.இதனால் அவர் தொழிலை இழந்து வீட்டில் உள்ளார். வருமானம் எதுவுமில்லை.வீட்டில் வறுமை.அவரது 2 பிள்ளைகளும் பட்டினியில்.அவர்களின் பசியை போக்குவதற்காக கடை ஒன்றில் திருடியுள்ளார்.இறுதியில் பொலிஸாரால் கைது செய்யப்பட்டார். பொலிஸாரின் விசாரணையின்போது தான் இவ்வாறு திருடியமைக்கான காரணத்தைக் கூறியுள்ளார்.

ஜனாஸா நல்லடக்கத்துக்கு அனுமதியுங்கள் 

Wed, 23 Dec 2020 06:45:22 +0530

கொரோனாவால் மரணிக்கும் முஸ்லிம்களின் ஜனாஸாக்களை நல்லடக்கம் செய்யும் உரிமையை முஸ்லிம்களுக்கு வழங்கிவிடுங்கள் என்று முன்னாள் சபாநாயகர் கரு ஜயசூரிய அரசிடம் கோரிக்கை விடுத்துள்ளார்.இது தொடர்பில் அவர் மேலும் கூறுகையில்; இந்த நாட்டு பிரஜைகள் அனைவரும் அவர்களது சமய அடிப்படையில் இறுதி கிரியைகளை மேற்கொள்வதற்கு உரிமை உண்டு.அந்த உரிமைகள் மறுக்கப்படக்கூடாது. இன்று கொரோனாவால் மரணிக்கும் முஸ்லிம்களின் உடல்களை அடக்கும் செய்யும் உரிமைகள் மறுக்கப்பட்டு வருகின்றமை கவலை தருகின்றது. அந்த உடல்களை மாலைதீவில் அடக்குவதற்கு நடவடிக்கை எடுக்கப்பட்டு வருவதாக சொல்லப்படும் செய்தி வேதனைக்குரியது.இந்த நாட்டு மக்களின் உடல்கள் இந்த நாட்டில்தான் அடக்கப்பட வேண்டும். இவ்வாறான நடவடிக்கைகள் நிறுத்தப்பட வேண்டும்.முஸ்லிம்களின் உரிமை மதிக்கப்பட வேண்டும்.என்றார்.

ஜனவரி 11 இல் பாடசாலைகள் திறப்பு 

Mon, 21 Dec 2020 12:10:31 +0530

அடுத்த வருடம் ஜனவரி மாதம் 11 ஆம் திகதி தரம் 1 முதல் 5 வரையான மாணவர்களுக்காக பாடசாலைகள்  திறக்கப்படும் என்று கல்வி அமைச்சு தெரிவித்துள்ளது.அத்தோடு,முன்பள்ளிகளும் திறக்கப்படவுள்ளன. மேல் மாகாணம் மற்றும் தனிப்படுத்தப்பட்டுள்ள பகுதிகளில் உள்ள பாடசாலைகள் திறக்கப்படமாட்டாது என்றும் கல்வி அமைச்சு மேலும் தெரிவித்துள்ளது.

கொரோனாவால் நாட்டில் உணவுத் தட்டுப்பாடு:25 வீதமான மக்கள் பட்டினியில்! 

Sun, 20 Dec 2020 11:30:40 +0530

கொரோனா பரவல் காரணமாக இலங்கையில் பெரும் உணவுத் தட்டுப்பாடு ஏற்படும் என்றும் மொத்த சனத்தொகையில் 25 வீதமான மக்களுக்கு உணவு கிடைக்காமல் போகும் என்றும் உலக உணவு நிறுவனம் இலங்கை அரசுக்கு தெரிவித்துள்ளது. இலங்கை உணவு பொருட்களை இறக்குமதி செய்வதில் கொரோனா காரணமாக சர்வதேச மட்டத்தில் ஏற்பட்டுள்ள கட்டுப்பாடுகள் இதற்கு ஒரு காரணமாகவும் உள்ளது. இதற்கு மாற்றுத் தீர்வாக உணவு உற்பத்திகளை இலக்கையிலேயே மேற்கொள்வதற்கு நடவடிக்கை எடுக்கப்பட்டுள்ளது என்று அரசு தெரிவித்துள்ளது. பயிர் உற்பத்தி செய்யப்படாமல் இருக்கும் நிலங்களை உற்பத்திக்கு பயன்படுத்துவதற்கும் தூர்ந்து போய்க் கிடக்கும் குளங்களை புனரமைப்பதற்கும் நடவடிக்கை எடுக்கப்பட்டுள்ளது என்றும் அரசு மேலும் தெரிவித்துள்ளது.

அடுத்த மாதம் நாடு முழுமையாகத் திறக்கப்படும்

Sun, 20 Dec 2020 11:04:55 +0530

சுற்றுலா துறையை மேம்படுத்தும் நோக்கில் அடுத்தமாதம் நடுப்பகுதியில் நாடு முழுமையாக திறக்கப்படும் என்று பஸில் ராஜபக்ஸ தெரிவித்துள்ளார். பொருளாதார வீழ்ச்சியில் இருந்து நாட்டை காப்பாற்றும் நோக்கில் சுகாதார வழிமுறைகளுக்கு அமைவாக வெளிநாட்டு சுற்றுலா பயணிகளுக்காக நாடு முழுமையாகத் திறக்கப்படும் என்று அவர் மேலும் கூறினார். எதிர்வரும் 26 ஆம் திகதி 38 விமானங்களில் 9600 சுற்றுலா பயணிகளை நாட்டுக்கு அழைத்து வருவதற்கு ஏற்பாடு  செய்யப்பட்டுள்ளது என்றும் பஸில் தெரிவித்தார்.

தனிமைப்படுத்தப்பட்ட பகுதிகளின் ஊடாகச் செல்லும் பெண்களின் கவனத்துக்கு!

Sat, 19 Dec 2020 11:53:37 +0530

கொரோனா தொற்று காரணமாக தனிமைப்படுத்தப்பட்டுள்ள பகுதிகளின் ஊடாக பயணம் செய்யும் பெண்கள் அவதானமாகப் பயணிக்குமாறு பொலிஸ் ஊடகப் பேச்சாளர் அஜித் ரோஹன கோரிக்கை விடுத்துள்ளார். அவ்வாறான பல பகுதிகளின் ஊடாக பயணம் செய்யும் பெண்களின் தங்கச் சங்கிலிகள் சிலரால் கொள்ளையிடப்பட்டுள்ள சம்பவங்கள் பதிவாகியுள்ளன என்றும் இது தொடர்பில் அவதானமாக பயணிக்குமாறும் அவர் கூறியுள்ளார். குறிப்பாக,வேலைக்குச் செல்லும் பெண்கள் அவ்வாறு வேலைக்குச் செல்லும்போதும் வீட்டுக்குத் திரும்பி வரும்போதும் அவதானமாக இருக்க வேண்டும் என்றும் அவர் கூறினார். திருடர்கள் மோட்டார் சைக்களில் வந்து பெண்களிடம் முகவரி கேட்பதுபோல் நெருங்கி மாலையை கொள்ளையடித்துச் செல்ல முடியும். அவ்வாறு வருபவர்கள் தொடர்பில் அவதானமாக இருக்க வேண்டும் என்று அஜித் ரோஹன மேலும் தெரிவித்துள்ளார். 

அதுலுகமவில் விஸ்வரூபம் எடுக்கும் கொரோனா:மூன்றில் ஒரு பகுதியினருக்கு தொற்று

Sun, 13 Dec 2020 12:07:20 +0530

பண்டாரகம அதுலுகமவில் வசிக்கும் 20 ஆயிரம் மக்களுள் மூன்றில் ஒரு பகுதியினருக்கு கொரோனா தொற்று ஏற்பட்டுள்ளது என்று பண்டாரகம,மெதகம பொது சுகாதார வைத்திய அதிகாரி  எஸ்.யு.மதுஷான் தெரிவித்தார். அங்கு அண்மையில் 1541 பேருக்கு மேற்கொள்ளப்பட்ட பிசிஆர் பரிசோதனையின்போது 547 பேருக்கு கொரோனா தொற்று ஏற்பட்டிருப்பது தெரிய வந்தது. இதன்மூலம் அந்த மக்களில் மூன்றில் ஒரு பகுதியினருக்கு கொரோனா தொற்று ஏற்பட்டிருக்கின்றமை உறுதி செய்யப்பட்டுள்ளது. இதனைத் தொடர்ந்து அங்கு மேலும் 18,459 பேருக்கு பிசிஆர் பரிசோதனை மேற்கொள்ளப்படவுள்ளது.

481 இலங்கையர்கள் நாடு திரும்பினர்

Tue, 08 Dec 2020 10:56:56 +0530

வெளிநாடுகளில் இருந்து இருந்து 481 இலங்கையர்கள் நாடு திரும்பினர்.சற்று நேரத்திற்க்கு முன் அவர்கள் கட்டுநாயக்க விமான நிலையத்தை வந்தடைந்தனர். அதன்படி,அபுதாபியில் இருந்து 44 பேரும் கட்டாரில் இருந்து 147 பேரும் ஏனைய மத்திய கிழக்கு நாடுகளில் தொழிலுக்கு சென்று நிற்கதியாகிய 290 பேரும் நாட்டை வந்தடைந்தனர். அவர்கள் அனைவரும் pcr சோதனைக்கு உட்படுத்தப்பட்ட பின்னர்  தனிமைப்படுத்தல் நிலையங்களுக்கு அனுப்பி வைக்கப்படுவர்.

கொரோனாவை விசாரிக்க சென்ற 20 சிஐடிக்கு கொரோனா 

Tue, 08 Dec 2020 10:34:10 +0530

பிரான்டிக்ஸ் ஆடை தொழில்சாலையில் கொரோனா தொற்று ஏற்பட்டிருப்பது எப்படி என்று விசாரிக்க சென்ற சிஐடியினர் 20 பேருக்கு கொரோனா தொற்று ஏற்பட்டுள்ளது என்று பொலிஸ் ஊடக பேச்சாளர் அஜித் ரோகண தெரிவித்துள்ளார். இது தொடர்பாக நவம்பர் 5 முதல் பொலிஸார் விசாரித்து வருகின்றனர்.அவர்கள் பிரான்டிக்ஸ் ஊழியர்களையும் விசாரித்து வருகின்றனர். சட்டமா அதிபரின் அறிவுறுத்தலுக்கு அமைய பொலிஸ்மா அதிபர் கொழும்பு குற்ற பிரிவை சேர்ந்த பொலிஸாரை விசாரணைக்கு அமர்த்தினார்.அவர்களுள் 70 பேருக்கு கொரோனா தொற்று ஏற்பட்டதால் சிஐடியினரை அந்த பணிக்கு நியமித்தார். அவ்வாறு நியமிக்கபட்ட 20 பேருக்கே இப்போது கொரோனா தொற்று ஏற்பட்டுள்ளது.

அமைச்சருக்கு 2.5 கோடி ரூபா லஞ்சம்: எதற்கு தெரியுமா?

Sun, 06 Dec 2020 12:09:55 +0530

ஷாம்பூ ,ஜெல் அடங்கிய ஸசே பக்கட்களின் தடையை 6 மாதங்களுக்கு ஒத்திப் போடுவதற்காக சுற்றால் அமைச்சர் மஹிந்த அமரவீரவுக்கு 2.5 கோடி ரூபாவை லஞ்சமாக வழங்குவதற்கு தனியார் நிறுவனம் ஒன்று திட்டமிட்டுள்ளது என்று தகவல்கள் வெளியாகியுள்ளன. எதிர்வரும் ஜனவரி முதல் ஷாம்பூ ,ஜெல்,பால்,உணவு பொருட்கள்  அடங்கிய ஸசே பக்கட்களை தடை செய்வதற்கு சுற்றாடல் அமைச்சு தீர்மானித்துள்ளது. அந்தத் தடையை ஒத்திப் போடுவதற்காக அந்த சுற்றால் அமைச்சருக்கு 2.5 கோடி ரூபாவை லஞ்சமாக வழங்குவதற்கு தனியார் நிறுவனம் ஒன்று திட்டமிட்டுள்ளது. அந்த பணத்தை அமைச்சரின் தேவைக்காகவோ அல்லது அமைச்சின்  தேவைக்காகவோ பயன்படுத்த முடியும் என்று அந்த நிறுவனத்தின் பிரதிநிதிகள் அமைச்சரிடம் தெரிவித்துள்ளனர். அமைச்சரோ அதை மறுத்துள்ளார்.2500 கோடி ரூபா தந்தாலும் அரசின் இந்த முடிவில் மாற்றமில்லை என்று அவர்களிடம் கூறியுள்ளார். ஸசே பக்கட்கள் சூழலுக்கு அதிக பாதிப்புகளை உண்டு பண்ணுவதாலேயே அவற்றை தடை செய்வதற்க்கு நடவடிக்கை எடுக்க பட்டுள்ளது என்று அமைச்சர் கூறியுள்ளார்.