டொலர் இல்லை:கடலில் மிதக்கும் எரிபொருள் கப்பல் 

டொலர் தட்டுப்பாடு காரணமாக ஒரு லட்சம் மெட்ரிக் தொன் மசகு எண்ணையை ஏற்றி வந்த கப்பல் ஒன்று 6 நாட்களாக கடலில் நங்கூரமிடப்பட்டுள்ளது என்று அறிய முடிகிறது. தாமதக் கட்டணத்தைச் செலுத்திக்கொண்டு அந்தக் கப்பல் நிற்கிறது. இன்னும் சில நாட்களில் இந்தப் பிரச்சினைக்கு முடிவு கட்டப்படும் என்று அரசு தெரிவிக்கிறது.

மாறுகிறது நம்பிக்கை இல்லா பிரேரணை 

ஜனாதிபதிக்கு எதிராக ஐக்கிய மக்கள் சக்தியால் சமர்ப்பிக்கப்பட்ட நம்பிக்கை இல்லா பிரேரணை ஜனாதிபதிக்கு எதிராக அதிருப்தியை வெளிக்காட்டும் பிரேரணையாக அக்கட்சியாலேயே திருத்தப்பட்டுள்ளது. இவ்வாறு திருத்தப்பட்ட பிரேரணை 17ஆம் திகதி நாடாளுமன்றில் விவாதத்துக்கு எடுக்கப்படுகிறது.

அலறி மாளிகைக்குள் சிக்கிய ஆயிரம் பேர்:2 நாட்களின் பின்பே வெளியேற்றம் 

முன்னாள் பிரதமர் மஹிந்தவுக்கு ஆதரவு வழங்குவதற்காக அவரது ஆதரவாளர்கள் அலரி மாளிகைக்கு 9ஆம் திகதி அழைத்துவரப்பட்டார்கள் அல்லவா. அவர்களுள் சிலர் மைனா கம மற்றும் கோட்டா கோகம பகுதியில் இருந்த ஆர்ப்பாட்டக்காரர்கள்மீது தாக்குதல் நடத்தியதும் நாடு பூராகவும் கலகம் வெடித்தது. இதனால் அலரிமாளிகைக்கு வந்தவர்களுள் சுமார் ஆயிரம் பேர்வரை வெளியேற முடியாமல் இரண்டு நாட்களாக அங்கேயே தங்கி இருந்துள்ளனர். பாதுகாப்புத் தரப்பின் ஏற்பாட்டில் அவர்கள் இரண்டு நாட்கள் கழித்தே வெளியேற்றப்பட்டுள்ளனர். 

அரசியல்வாதிகளின் சொத்துக்கள் எரிப்பு: ரூ.2000 நஷ்டம் 

கடந்த வாரம் இடம்பெற்ற வன்முறைக்குள் சிக்கி எரிக்கப்பட்ட அரசியல்வாதிகளின் சொத்துக்களின் பெறுமதி 2 ஆயிரம் கோடி ரூபாவுக்கும் அதிகமானது என மதிப்பிடப்பட்டுள்ளது. இவற்றுள் காப்புறுதி செய்யப்பட்டுள்ள சொத்துக்களுக்கு நஷ்டஈடு வழங்குவதில் காப்புறுதி நிறுவனங்கள் பெரும் சிக்கலை எதிர்நோக்குகின்றன. ஒரே நேரத்தில் பெரும் தொகையான நஷ்டயீட்டை வழங்க வேண்டி இருப்பதால் நிதி நெருக்கடையை அந்த நிறுவனங்கள் எதிர்நோக்குகின்றன. மேற்படி வன்முறையால் அரசியல்வாதிகளின் 55 வீடுகள்,200 வாகனங்கள் எரிக்கப்பட்டமை குறிப்பிடத்தக்கது.

உள்ளே போகலாம்:வெளியேற முடியாது

எதிர்வரும் 17 ஆம் திகதி நாடாளுமன்றம் கூடும்போது நாடாளுமன்றத்தைச் சுற்றி அன்றைய தினமும் ஆர்ப்பாட்டம் இடம்பெறவுள்ளது. அன்றைய தினம் எம்பிக்கள் அனைவரும் நாடாளுமன்றத்துக்குள் நுழைந்ததன் பின்பே ஆர்ப்பாட்டம் தொடங்கும். எம்பிக்கள் அனைவரையும் நாடாளுமன்றத்துக்குள் நுழையவிட்டு அவர்கள் அங்கிருந்து வரமுடியாமல் தடுப்பதே இந்த ஆர்ப்பாட்டத்தின் நோக்கம்.

திகதி இன்று தீர்மானிக்கப்படும் 

ஐக்கிய மக்கள் சக்தி சமர்ப்பித்துள்ள அரசுக்கு எதிரான நம்பிக்கை இல்லா பிரேரணை மீதான விவாதத்துக்கான திகதியை சபாநாயகர் இன்று அறிவிக்கவுள்ளார். இது தொடர்பில் சபாநாயகருக்கும் கட்சித் தலைவர்களுக்கும் இடையிலான கலந்துரையாடல் ஒன்று இன்று காலை 10 மணிக்கு இடம்பெறவுள்ளது. இந்தச் சந்திப்பிலேயே விவாதத்துக்கான திகதி அறிவிக்கப்படும்.

20 நாட்களில் ரூ.1500 கோடி அச்சடிப்பு 

கடந்த 20 நாட்களில் அதாவது புதிய ஆளுநர் பதவியேற்றது முதல் இப்போதுவரை மத்திய வாங்கி 1500 கோடி ரூபாவை அச்சடித்துள்ளது. ஏப்ரல் 8 ஆம் திகதி முதல் ஏப்ரல் 29ஆம் திகதி வரையான காலப்பகுதிக்குள்ளேயே இந்த அச்சடிப்பு இடம்பெற்றுள்ளது என்று தெரிய வருகிறது. அஜித் நிவார்ட் கப்ரால் ஆளுநராக இருந்தபோது இந்த வருடம் ஜனவரி முதலாம் திகதி முதல் ஏப்ரல் 7 ஆம் திகதிவரை 43270 கோடி ரூபா அச்சடிக்கப்பட்டது. இப்போது அச்சடிக்கப்பட்டிருக்கும் தொகையையும் சேர்த்து  மொத்தமாக ஜனவரி முதலாம் திகதி முதல் ஏப்ரல் 29 ஆம் திகதிவரையான 4 மாதங்களில் 44760 கோடி ரூபா அச்சடிக்கப்பட்டுள்ளது.

அரசுக்கு எதிராக இதுவரை 120 எம்பிக்கள்:இன்னும் இணைவர் 

அரசுக்கு எதிராக எதிர் தரப்பில் இதுவரை 120 எம்பிக்கள் இணைந்துள்ளனர் என்று உதய கம்மன்பில எம்பி இன்று கூறினார். சஜித் அணியில் 65 எம்பிக்கள்.42 பேர் அரசில் இருந்து எதிர்தரப்புக்கு மாறினோம்.அதில் மூவர் மீண்டும் அரசுடன் இணைந்து அமைச்சுப் பதவிகளை எடுத்தனர்.இதனால் 39 எம்பிக்களாகக் குறைந்தனர்.65 உம் 39 உம் சேர்ந்து 104 எம்பிக்கள்.  இடைக்கால சர்வகட்சி  அரசை உருவாக்குவதற்காக அரசு உடன் பதவி விலக வேண்டும் என்று 10 பேர் கோரிக்கை விடுத்துள்ளனர்.அவர்களையும் சேர்த்தால் 114 பேர். 20 ஆவது திருத்தத்துக்கு அரசுக்கு ஆதரவு வழங்கிய 3 முஸ்லீம் எம்பிக்கள் இப்போது அரசுக்கான ஆதரவை நீக்கிக்கொண்டு மீண்டும் அவர்களது கட்சிக்குத் திரும்பியுள்ளனர்.அவர்களுடன் சேர்த்து 117 பேர். நாளக கொடகேவா,டலஸ் அழகப்பெரும மற்றும் சரித ஹேரத் ஆகியோரும் சர்வ கட்சி இடைக்கால அரசை உருவாக்குவதற்காக அரசு விலக வேண்டும் என்று கூறியுள்ளனர்.அவர்களுடன் சேர்த்து 120 பேர். இந்த 120 பேரும் அரசு விலக வேண்டும் என்ற நிலைப்பாட்டில் உள்ளனர்.அதேபோல் நம்பிக்கை இல்லா பிரேரணை கொண்டு வரப்படும்போது அரசில் உள்ள அதிகமான எம்பிக்கள் பிரேரணைக்கு ஆதரவாக வாக்களிப்பர்.என்றார். 

10 பேருக்கு கொமிஷன்:கேஸ் விலையேற்றத்துக்கு இதுவே காரணம் 

கேஸை இறக்குமதி செய்யும்போது 10 பேர் கொமிஷன் பெறுகின்றனர் என்றும் அதனாலேயே கேஸின் விலை தாறுமாறாக ஏறியுள்ளது என்று தகவல்கள் வெளியாகியுள்ளன. ரஷியாவில் இருந்து குறைந்த விலையில் எரிவாயுவை கொள்வனவு செய்வதற்கு வாய்ப்பு இருந்தபோதிலும் லிட்ரோ கேஸ் நிறுவனத்தில் இருந்த சில அரசியல் செல்வாக்கு உள்ளவர்களின் தலையீட்டால் அது நடக்காமல் போனது. அவர்கள் தலையீட்டு அதிக கொமிஷன் வைத்து கேஸை கொள்வனவு செய்ததால்தான் விலை அதிகரிப்பு இடம்பெற்றுள்ளது என்றும் அவர்கள் இதன்மூலம் சம்பாதித்து கோடீஸ்வரர்களாகி  அந்தப் பணத்தை அவர்கள் சுவீஸ் வங்கியில் வைப்பில் இட்டுள்ளனர் என்றும் பத்திரிகை ஒன்று செய்தி வெளியிட்டுள்ளது.

அபிவிருத்தியில் என்னோடு யாரும் மோதமுடியாது 

அபிவிருத்தியில் என்னோடு யாரும் மோதமுடியாது.அதில் நான் தோல்வியடைந்தால் இராஜினாமா செய்துவிட்டு வீட்டுக்குச் சென்றுவிடுவேன் என்று எதிர்கட்சித் தலைவர் சஜித் பிரேமதாஸா தெரிவித்துள்ளார். அவர் மேலும் கூறுகையில்: 225 பேரும் வீட்டுக்குச் செல்ல வேண்டும் என்பதை ஏற்க முடியாது.எல்லோரும் ஒன்றுதான் என்பதில் உடன்படுகிறேன். நாங்கள் 2020 பெப்ரவரியில் ஐக்கிய மக்கள் சக்தியை உருவாக்கினோம்.எல்லோரும் ஒன்றுதான் என்ற கருத்தில் இருந்து மாறுபடுவதே எமது நோக்கம். அபிவிருத்தியில் என்னோடு யாரும் மோதமுடியாது.மோதிப்பாருங்கள்.அதில் நான் தோல்வியடைந்தால் இராஜினாமா செய்துவிட்டு வீட்டுக்குச் சென்றுவிடுவேன்.என்றார்.

வாகனங்கள்-வீடுகளை ஒப்படைக்காத முன்னாள் அமைச்சர்கள் 

முன்னாள் அமைச்சர்கள் அமைச்சுப் பதவிகளை இராஜினாமா செய்தபோதிலும் உத்தியோகபூர்வ வாகனங்களையும் வீடுகளையும் இன்னும் ஒப்படைக்கவில்லை என்று அறிய முடிகிறது. மேலும்,அமைச்சர்களாக இருக்கும்போது வழங்கப்பட்டு வந்த அதே பாதுகாப்பு இன்னும் அப்படியே உள்ளது என்றும் தெரிவிக்கப்படுகிறது. அதவாது,அமைச்சுப் பதவிகள் மட்டும்தான் இல்லை.அமைச்சர்களுக்குரிய அத்தனை சலுகைகளையும் அனுபவிக்கின்றனர்.

சபாநாயகரிடம் ஒப்படைக்கப்படுகிறது எதிர்கட்சி எபிக்களின் சத்தியப்பிரமாணம் 

எதிர்க்கட்சி எம்பிக்கள் அனைவரும் தாங்கள் எதிர்க்கட்சி எம்பிக்கள் என்று சத்தியப்பிரமாணம் எடுத்து அது அவர்களின் கையெழுத்துக்களுடன் சபாநாயகரிடம் ஒப்படைக்கப்படவுள்ளது. இதன்மூலம் எதிர்க்கட்சி எம்பிக்கள் மொத்த எண்ணிக்கை தெளிவாகத் தெரிய வரும் என்றும்  இதற்கான ஏற்பாடுகள் இடம்பெற்றுக்கொண்டிருக்கின்றன என்றும்  உதய கம்மன்பில எம்பி தெரிவித்துள்ளார். நம்பிக்கை இல்லா தீர்மானத்தைவிட எதிர்க்கட்சி எம்பிக்களின் பலத்தை சபையில் உறுதிப்படுத்துவதே சிறந்தது என்று அவர் தெரிவித்துள்ளார்.

அவர் தீ வைக்க வரவில்லை

ரம்புக்கனவில் சுட்டுக்கொல்லப்பட்ட நபர் எரிபொருள் பௌஸருக்கு தீ வைக்க வந்தவர் அல்ல.அவர் எனது கட்சி உறுப்பினரின் ஆதரவாளர்.இவரது கொலை தொடர்பில் சுயாதீன விசாரணை தேவை என்று ரணில் விக்ரமசிங்க இன்று நாடாளுமன்றில் கூறினார். பண்டாரநாயக்கவின் கஷ்டமான யுகத்தில்கூட எரிபொருள் தட்டுப்பாடின்றி கிடைத்தது.இப்போது நிலைமை அதைவிட மோசம். மக்கள் பெரும் துன்பத்தில் வீழ்ந்துள்ளார்கள்.உடனடியாகத் தீர்வை வழங்க வேண்டும்.இல்லாவிட்டால் நாம் வீட்டுக்குச் செல்ல வேண்டும்.இப்படியே இழுத்துக்கொண்டு செல்ல முடியாது. வெடிக்கும் கட்டத்துக்கு வந்துள்ளோம்.கட்சித் தலைவர்கள் ஒன்றிணைந்து பேசி ஜனாதிபதிக்கு யோசனையை சமர்ப்பிப்போம்.என்றார்.

10 நாட்களுக்கு போதுமான பெற்றோல்; 14 நாட்களுக்குப் போதுமான டீசல் கையிருப்பில்!

10 நாட்களுக்கு போதுமான பெற்றோலும் 14 நாட்களுக்குப் போதுமான டீசலும் கையிருப்பில் உள்ளது என்று அமைச்சர் காஞ்சன விஜயசேகர இன்று நாடாளுமன்றில் தெரிவித்தார். இன்றும் கப்பல் வருகிறது நாளையும் வருகிறது என்று மேலும் கூறினார்.ஏற்கனவே வந்த கப்பலில் இருந்து எரிபொருள் இறக்கப்படுகிறது என்றும் கூறினார். அதேபோல்,மின்சக்திக்கு தேவையான டீசல் வழங்கப்பட்டுள்ளது.விநியோகிப்பதில்தான் பிரச்சினை உள்ளது என்று அவர் கூறினார். ஆனால்,அரசு சொல்வதுபோல் போதுமான அளவில் எரிபொருள் கையிருப்பில் இல்லை.தினமும் நான்கு கப்பல்கள் வந்தால்தான் போதுமான அளவு கிடைக்கும் என்று ரணில் விக்ரமசிங்க தெரிவித்துள்ளார். அதற்கு பதிலளிக்கும்போதே இவ்வாறு கூறினார் காஞ்சன விஜயசேகர.

பல மின் உற்பத்தி நிலையங்களில் டீசல் இல்லை: இன்று 4.30 முதல் 10.30 வரை மின்வெட்டு 

நாடு பூராகவும் இன்றும் மின் வெட்டு இடம்பெறும் என்று பொது பயன்பாட்டு ஆணைக்குழு தெரிவித்துள்ளது. இன்று பல மின் உற்பத்தி நிலையங்களில் டீசல் தீர்ந்துள்ளது.இதனால்,பிற்பகல் 4.30 மணி முதல் இரவு 10.30 மணிவரை நாடு பூராகவும் சுழட்சி முறையில் மின்வெட்டு இடம்பெறும் என்று அறிவிக்கப்பட்டுள்ளது. இரண்டு மற்றும் மூன்று மணிநேர அடிப்படையில் இந்த மின்வெட்டு இடம்பெறும். அதன்படி ,A -வலயத்தில் பிற்பகல் 4.30 மணி முதல் 6.30 மணி வரையும்,B-வலயத்தில் 6.30 முதல் 8.30 வரையும் C -வலயத்தில் 8.30 முதல் 10.30வரையும் இரண்டு மணி நேர மின்வெட்டு இடம்பெறும். மேலும்,P ,Q ,R ,Sவலயத்தில் 4.30 முதல் 7.30 வரையும் T, U,V ,W வலயத்தில் 7.30 முதல் 10.30 வரையும் மூன்று மணிநேர மின்வெட்டு இடம்பெறும். 

மரணித்த யாசகரின் கால்ச் சட்டை பையில் ரூ.4 லட்சம் 

ஹக்மன நகரில் உயிரிழந்த யாசகர் ஒருவரின் கால் சட்டை பையில் இருந்து 4 லட்சம் ரூபா பணம் கண்டெடுக்கப்பட்டுள்ளது. திருமணம் முடிக்காது தனிமையில் வாழ்ந்து வந்த 69 வயது யாசகர் ஒருவர் நேற்று முன்தினம் இரவு பள்ளத்தில் வீழ்ந்து அகால மரணமடைந்தார்.  அவர் அணிந்திருந்த கால் சட்டை பைக்குள் சில ரகசிய அறைகள் இருந்ததை பொலிஸார் கண்டுபிடித்தனர்.அந்த இடங்களில் சோதனை செய்த பொலிஸார் 3 லட்சத்து 80 ஆயிரம் ரூபாவுக்கு மேற்பட்ட பணத்தை கண்டு பிடித்தனர் என்று ஹக்மன பொலிஸார் தெரிவித்தனர்.

சுகாதார ஊழியர்கள் வேலை நிறுத்தம் 

பல்வேறு கோரிக்கைகளை முன்வைத்து சுகாதார ஊழியர்கள் இன்று நாடு பூராகவும் வேலை நிறுத்தத்தில் ஈடுபடுகின்றனர்.16 தொழில் சங்கங்கள் இதில் இணைந்துள்ளன. இது தொடர் வேலை நிறுத்தம் என்று ஏற்பாட்டாளர் ரவி குமுதேஸ் தெரிவித்துள்ளார்.10 வைத்தியசாலைகள் மட்டும் இதற்கு விதிவிலக்கு.

திருட்டுத்தனமாக எம்பிக்கள் இல்லங்களில் தங்கி இருக்கும் முன்னாள் எம்பிக்கள்: வழக்குத் தாக்கல் செய்ய முடிவு 

கடந்த நாடாளுமன்றத் தேர்தலில் தோல்வியடைந்தபோதிலும் மாதிவள எம்பிக்கள் இல்லங்களில் இருந்து வெளியேறாமல் இன்னும் 8 முன்னாள் எம்பிக்கள் திருட்டுத்தனமாகத் தங்கியுள்ளனர் என்று தெரிவிக்கப்படுகிறது. அவர்களை வெளியேற்றுவதற்கு நடவடிக்கை எடுக்கப்பட்டுள்ளது என்றும் அவர்களுக்கு எதிராக வழக்கத் தாக்கல் செய்யப்படவுள்ளது என்றும் நாடாளுமன்ற உயர் அதிகாரி ஒருவர் தெரிவித்தார்.